මේ වනවිට සර්වපාක්ෂික ආණ්ඩු සංකල්පයෙන් බැහැරව එකිනෙකා ඇමති ධූර බෙදාගැනීමට උත්සාහ ගන්නා බවක් පෙනී යන බව පාර්ලිමේන්තු මන්ත්‍රී උදය ගම්මන්පිල මහතා පවසනවා.
ඒ, පක්ෂ දහයේ නියෝජිතයින් අතර පැවැති සාකච්ඡාවකින් පසු මාධ්‍ය වෙත අදහස් දක්වමින්,
බලඅරගලය මිස සාමුහිකව මේ රට නරා වලෙන් ගොඩ ගැනීමට අවශ්‍ය බව පිළිබඳව හැඟීමවත් මෙරට දේශපාලන නායකයන්ට නොමැති බවයි ඔහු පවසන්නේ.
“අපි ගෝඨාභය ජනාධිපතිතුමාට සර්වපාක්ෂික ආණ්ඩුවක් බිහිකළ යුතුයි කියන සංකල්පය ඉදිරිපත් කරලා මේ වනවිට මාස 4කට වැඩියි. අපි යෝජනාවලියක් ඉදිරිපත් කළා. ඊට කලින් මාර්තු 2 වනදා මුළු රටම හරි මඟට කියලා මේ ආර්ථික අර්බුදයෙන් ගොඩ යන්න අපේ විසඳුම් යෝජනාවලියක් ජනගත කරා. නමුත් මේ වන තුරු යෝජනාවලියක් ඉදිරිපත් කරනවා වෙනුවට අද යන්නේ කේවල් කිරීම්. ඔයාලට ඇමති ධූර කීයක් ඕනේ ද? අහවල් එක දුන්නොත් කොහොම ද? මං හිතන්නේ ඇමතිකම් තනතුරු බෙදාගැනීමේ කේවල් කිරීමේ පහත් තැනින් උඩට ඇවිල්ලා මේ රටේ තියෙන අර්බුදය ගැන හිතලා ඇමති තනතුර බෙදාගන්නේ කොහොම ද කියන එක නෙමෙයි වැඩපිළිවෙල මොකද්ද කියන එකට සියලුදෙනාගේ අවධානය යොමු වෙන්න ඕනේ. තාමත් මම නම් දකින්නේ බලඅරගලය මිසක් සාමුහිකව මේ රට නරා වලෙන් ගොඩ ගන්න ඕනේ කියන හැඟීමවත් තාම අපේ රටේ දේශපාලන නායකයන්ට ඇවිල්ලා නෑ. ඉතාම අවාසනාවන්තයි.”
ප්‍රශ්නය –
“සර්වපාක්ෂික රජයක් පිහිටුවනවා කියන්නේ සිහිනයක් ද?”
මන්ත්‍රීවරයා –
“තාම සිහිනයයි යථාර්ථයයි මැද දෝලනය වෙමින් පවතින්නේ. හැබැයි ජනාධිපති පාර්ලිමේන්තුව අමතන වේලාවේ සර්වපාක්ෂික සේයාවක් පෙනුනා. ජනාධිපතිතුමාගේ සමහර කතාවලට ආණ්ඩුවෙන් අත්පොළසන් ආවා. සමහර ඒවට විපක්ෂයෙන් ආවා. මට නිකන් දැනුනා සර්වපාක්ෂික වැඩේ හරි වගේද කියලා. හැබැයි ඒවා රඟපෑම් වගේ පේන්නේ මහ පොළොවේ ඒවා නෑ.”
