රාජ්‍ය අමාත්‍ය ඩයනා ගමගේ මහත්මිය විසින් ගොනු කළ පෙත්සමක් හේතුවෙන් විපක්ෂ නායක සජිත් ප්‍රේමදාස මහතා සහ රංජිත් මද්දුමබණ්ඩාර මහතාට ලබන ජනවාරි 25 වනදා අධිකරණය හමුවේ පෙනී සිටින ලෙස කොළඹ ප්‍රධාන දිසා විනිසුරු අද (09) නොතීසි නිකුත් කර තිබෙනවා.
ඒ සමඟි ජන බලවේගයේ සාමාජිකත්වය හා තනතුරු දැරීම පක්ෂයේ ව්‍යවස්ථාවට අනුව නිත්‍යානුකුල නොවන බව ප්‍රකාශ කරමිනුයි මෙම පෙත්සම ගොනු කර ඇත්තේ.
මෙම පෙත්සම ජනාධිපති නීතිඥ උදිත ඉගලහේවා මහතා විසින් කොළඹ දිසා අධිකරණය හමුවේ ගොනු කළ පෙත්සමෙන් රාජ්‍ය අමාත්‍යවරිය පෙන්වා දී ඇත්තේ සජිත් ප්‍රේමදාස හා රංජිත් මද්දුමබණ්ඩාර යන මහත්වරුන් තවදුරටත් එක්සත් ජාතික පක්ෂ සාමාජිකයන් බවයි.
එක්සත් ජාතික පක්ෂයේ මහලේකම්වරයා විසින් ලබාදුන් දිවුරුම් ප්‍රකාශයක් මෙන්ම රංජිත් මද්දුම බණ්ඩාර මහතා පක්ෂයේ විනය ක්‍රියාමාර්ග අභියෝගයට ලක්කළ අධිකරණ ක්‍රියාවලිය ඇතුළු සාක්ෂි කිහිපයක් ඇය සාක්ෂි වශයෙන් පෙත්සමේ ගොනුකර තිබෙනවා.
රාජ්‍ය අමාත්‍යවරිය පෙන්වා දෙන්නේ සමඟි ජනබලවේග පක්ෂ ව්‍යවස්ථාවේ තුන්වන පරිච්ඡේදයේ තුන්වන වගන්තියට අනුව පක්ෂයේ සාමාජිකයෙක් වෙනත් පක්ෂයක සාමාජිකත්වය දරන්නේ නම් එයින්ම සමඟි ජනබලවේගයේ සාමාජිකත්වය අහෝසි වන බවයි.
ඒ අනුව සජිත් ප්‍රේමදාස හා රංජිත් මද්දුමබණ්ඩාර යන මහත්වරුන් පක්ෂයේ සාමාජිකත්වය දැරීම නායක හා මහලේකම් යන තනතුරු දැරීම නිත්‍යානුකුල නොවන බවට නියෝගයක් ඉල්ලා සිටින ඩයනා ගමගේ මන්ත්‍රීවරිය සිය පෙත්සමේ සඳහන් කර ඇත්තේ එය විභාග කරන තෙක් තනතුරු දැරීම අත්හිටුවමින් වාරණ නියෝගයක් නිකුත් කරන ලෙසයි.
