රජයේ වත්මන් හැසිරීම මඩට වැටුණු මිනිසෙක් ඉන් ගොඩ ඒමට දැඟලීමට සමාන බව පාර්ලිමේන්තු මන්ත්‍රී ගුණපාල රත්නසේකර පවසනවා.
ඒ, අද (25) ”නිදහස” ජනතා සභාව විසින් පැවැත්වූ මාධ්‍ය හමුව අමතමින්.
ගෝඨාභය රාජපක්ෂ බලයට පැමිණ විශාල වශයෙන් බදු ආදායම් පහළ දැමූ වරදට සමාන වරදක් ඉතිහාසයේ නොවූ විරූ ලෙස බදු වැඩි කිරීම මගින් රජය සිදුකරමින් සිටින බවයි මන්ත්‍රීවරයා පවසන්නේ.
කෙසේවෙතත්, තමන් ඇතුළු 13 දෙනෙකු ප්‍රථමයෙන් ආණ්ඩුවෙන් ස්වාධීන වී විපක්ෂයට එකතු වුවා සේම දැන් 22 වැනි ආණ්ඩුක්‍රම ව්‍යවස්ථා සංශෝධනයෙන් පසුද පොහොට්ටුවේ බිඳ වැටීමක් තිබෙන බවත් හිතා ගැනීමටවත් නොහැකි පොහොට්ටු ප්‍රබලයින් පිරිසක් ජනාධිපතිවරයා සමඟ එකතුවීමට සැලසුම් කරමින් සිටින බවත් ඔහු පවසනවා.
තමන් දිවි ඇති තෙක් යළි දේශපාලනයට එක් නොවන බව මැයි 9 වන දින රාත්‍රියේ ඔහුගේ නිවසට පහර දී ගණි තැබීමෙන් පසුව කළක් ප්‍රවීන උපකාරක පන්ති දේශකයෙකු වූ හිටපු රාජ්‍ය ඇමති ගුණපාල රත්නසේකර පවසා සිටි නමුත් ඔහු තවමත් ක්‍රියාකාරීව දේශපාලනයේ යෙදෙනවා.
පසුගිය මහ මැතිවරණයේදී වියත්මග සංවිධානය හරහා පොහොට්ටු පක්ෂයෙන් කුරුණෑගල දිසිත්‍රික් මන්ත්‍රීවරයෙකු ලෙස පාර්ලිමේන්තුවට පිවිස සමුපකාර සේවා, අලෙවි සංවර්ධන හා පාරිභෝගික ආරක්ෂණ රාජ්‍ය අමාත්‍ය ධුරයට පත්වූ අතර අමාත්‍ය ධූරයේ කටයුතු කිරීමට තරම් සාමාජීය හා දේශපාලන ස්ථාවරභාවයක් රටේ නොමැති බව පවසමින් මැයි 06 වන දින පාර්ලිමේන්තුවේදී විශේෂ ප්‍රකාශයක් කරමින් සිය ධුරයෙන් ඉල්ලා අස් විය.
