හෙට (04) සහ අනිද්දා (05) දිනයන්හී මෙරටට පැමිණ සිටින යුක්‍රේන සංචාරකයින් පොළොන්නරුව හා සීගිරිය සංචාරක කලාපයන්හී ස්ථාන කිහිපයක සංචාරයේ නිරතවීමට නියමිත බැවින් අදාල ප්‍රදේශ දේශීය සංචාරකයන් හට විවෘත නොවන බව මධ්‍යම සංස්කෘතික අරමුදල නිවේදනය කරනවා.
ඒ අනුව යුක්‍රේන සංචාරකයින් පොළොන්නරුව පරාක්‍රම මාළිගා සංකීර්ණය, දළදා මළුව, ශිව දේවාල (අංක 02), රන්කොත් වෙහෙර, ලංකාතිලක වෙහෙර, කිරිවෙහෙර, ගල් විහාරය, තිවංක පිළිම ගෙය, නෙළුම් පොකුණ යන ස්ථාන හෙට (04) දිනයේ නැරඹීමට නියමිතයි.
එමෙන්ම පසුදා (05) සීගිරිය සංචාරක කලාපය නැරඹීමට ඔවුන් පැමිණීම හේතුවෙන් සීගිරිය දහවල් 12 දක්වා දේශීය සංචාරකයින් හට විවෘත නොකෙරේ.
මෙම යුක්‍රේන සංචාරකයින් ඉදිරි දින කිහිපයේදී දඹුල්ල හා මහනුවර සංචාරක කලාප තුළද සංචාරය කිරීමට නියමිත බවද මධ්‍යම සංස්කෘතික අරමුදල නිවේදනය කරනවා.
කෙසේ වෙතත් ඊයේ (02) දිනයේ යුක්‍රේන සංචාරකයින් යාල වනෝද්‍යානයේ සංචාරයේ රැගෙන ගිය සෆාරි ජීප් රථ රියදුරන් මේ වන විට දින 14 ක නිරෝධායනයට යොමු කර තිබෙනවා.
යුක්‍රේනයෙන් පැමිණි සංචාරකයින් 06 දෙනෙකුටද මේ වන විට කොවිඩ් 19 ආසාදනය වී ප්‍රතිකාර ලබමින් සිටිනවා.
