මාස ගණනක නිහැඩියාව බිදිමින් පළමුවරට ඇෆ්ගනිස්තාන ජනතාව ඇමතූ එරට වැඩබලන අගමැති මොහොමඩ් හසාන් අකුන්ද් ජනතාවට අවශ්ය ආහාර දෙවියන් යැද ඉල්ලා ගන්නයි සදහන් කර තිබේ.
අගමැතිවරයා ජනතාව හමුවේ අදහස් නොදක්වන බව පවසමින් ඔහුට එරෙහිව පසුගිය දිනවල සමාජ මාධ්ය ඔස්සේ දරුණු විවේචන එල්ල වෙමින් තිබිණ.
එම නිහඩතාවය බිදිමින් පසුගියදා ඇෆ්ගනිස්තාන ජාතික ගුවන් විදුලිය සහ රූපවාහිනිය ඔස්සේ ජනතාව ඇමතූ අගමැති මොහොමඩ් අකුන්ද් සදහන් කළේ තලේබාන් සංවිධානය කිසිවිටක ජනතාවට ආහාර ලබාදෙන බවට පොරොන්දු නොවූ බවයි.
හිටපු අගමැති අශ්රෝෆ් ඝානි අන්ත දූෂිත පාලනයක නිරත වී ඇති බවට මෙහිදී චෝදනා කළ අගමැති අකුන්ද් එහිදී රැස්කරගත් ධනය ජනාධිපති මන්දිරයේ තිබී සොයාගත් බව ද පැවසීය.
ඔහු තවදුරටත් සදහන් කළේ පැවති පාලනයේ පරිපාලන සහ මිලිටරි සාමාජිකයන්ට පොදු සමාවක් පිරිනමන බවයි.
කෙසේවෙතත්, එම සමාව අපරාධ සිදුකළ අයට අදාළ නොවන බවද ඔහු මෙහිදී අවධාරණය කළේය.
කාන්තාවන්ගේ අයිතිවාසිකම් සම්බන්ධයෙන් අදහස් පළකළ අගමැති අකුන්ද් ,එහිදී කියා සිටියේ ඉස්ලාමීය නීතියට අනුව එම අයිතිවාසිකම් හිමිවනු ඇති බවයි.