රටේ ආරක්ෂාව සම්බන්ධ ප‍්‍රධාන වගකීම් ඉන්දියාවට පැවරෙන ආකාරයේ ගිවිසුම්වලට එළඹිම සදහා කැබිනට් මණ්ඩලයට කැබිනට් පත‍්‍රිකා ඉදිරිපත්වී ඇති බව සමගි ජනබලවේගයේ පාර්ලිමේන්තු මන්ත්‍රී හරීන් ප‍්‍රනාන්දු මහතා පවසනවා.
ඒ, විශේෂ මාධ්‍ය හමුවක් කැඳවමින්.
ඒ අනුව, ගුවනේ ආරක්ෂාව සම්බන්ධයෙන් වගකීම් ඉන්දියාවට පැවරෙන අතර නාවික හමුදා මූලස්ථානය තුල කාර්යාලයක් පිහිටුවීමටද අවසර ලබාදීමට නියමිතව තිබෙන බවයි මන්ත්රීවරයා පවසන්නේ.
‘සමුද්රීය මුදවා ගැනීමේ සම්බන්ධීකරණ මධ්‍යස්ථානය’ නමින් මධ්‍යස්ථානයක් පිහිටුවා මේ ආකාරයට රටේ ආරක්ෂාව ඉන්දියාවට විකුණා ඇතැයි හරින් ප‍්‍රනාන්දු මන්ත්රීවරයා පෙන්වා දෙනවා.
රටට ආරක්ෂාව ලබාදෙන බව පවසමින් බලයට පැමිණි වැඩ කරන විරුවා දැන් රටේ ආරක්ෂාවත් ඉන්දියාවට විකුණා ඇති බවත් හරින් ප‍්‍රනාන්දු මන්ත්රීවරයා පවසනවා.
මෙහිදී වැඩිදුරටත් අදහස් දැක්වූ මන්ත්රීවරයා,
“මොනිටරින් එයාර් ක‍්‍රාෆ්ට් සදහා ලංකාවේ අහස විකුණලා.
ලංකාව ඉන්දියාවෙන් දිගටම ණය ගන්නවා. ඉන්දියාව එක්ක ගිවිසුම් තුනක් අත්සන් කරලා. එකක් තමයි, ලංකාවේ මිනිසුන්ගේ ඇඟිලි සලකුණු සියල්ලම ඉන්දියාවට ලබාදීමට කටයුතු කරමින් සිටිනවා. තාක්ෂණ අමාත්‍යාංශයට ඉන්දියාව සමග ගිවිසුම් අත්සන් කිරීමට අත්සන් කිරිමට අවසර ලබාදී තිබෙනවා
සමුද‍්‍ර මුදවා ගැනීමේ සම්බන්ධීකරණ මධ්‍යස්ථානයක් පිහිටුවීමට අවසර ලබාදී භාරතී ඉලෙක්ට්‍රොන් ආයතනය සමග ගිවිසුමක් අත්සන් කරනවා. මේක ඇතුලේ ටොන් හාරදාහක පාවෙන ඩොක් එකක් ලැබෙනවා. ඩ්‍රෝන යානා තුනක් ලැබෙනවා. ලංකාවේ ආරක්ෂාව ඉන්දියාව විකුණා අවසන්.
සමුද්රීය මුදවා ගැනීමේ සම්බන්ධීකරණ මධ්‍යස්ථානය නාවික හමුදා මූලස්ථානයේ පිහිටුවන්නේ. මේ වැඩ කරන විරුවා, ආරක්ෂාව දෙන්න ආපු විරුවා නාවික හමුදාවත්, ආරක්ෂාවත් ඉන්දියාවට විකුණා අවසන්.
මෙහි උප මධ්‍යස්ථානයක් හම්බන්තොට හදනවා. මුහුදේ ආරක්ෂාව ඉන්දියාවට දීලා, චීනයට වරාය දෙනවා. මේක මහ තකතීරු තීරණයක්
ඒ වගේම ඩිජිටල් හැදුනුම්පත හදන්න කියලා, ඇගිලි සලකුණු ඉන්දියාවට දෙනවා. අහසේ වෙන දේ සෙවීමත් ඉන්දියාවට ලබාදී තිබෙනවා. මේවා ගැන අපිට පැහැදිළි සැකයක් තියෙනවා
බැසිල් රාජපක්ෂ ඉන්දියාවට යාමට පෙර, මාර්තු 19 වැනිදා නීතිපති දෙපාර්තමේන්තුව මේවාට අවසර දෙනවා. 21 වැනිදා කැබිනට් එකටත් යනවා. සෙනසුරාදා නීතිපති දෙපාර්තමේන්තුවේ අනුමැතිය ලැබිලා සදුදාට කැබිනට් පත‍්‍රිකාවත් හැදිලා කැබිනට් එකටත් යන්නේ කොහොමද? බැසිල් රාජපක්ෂ ඉන්දියාවට යන්න කලින් මේවාට අනුමැතිය ලබාගෙන, ආවරණ අනුමැතියක් ලබාගෙන මේ සියලුම දේවල් අත්සන් කරලා තියෙනවා
ලංකාවේ මිනිස්සු තෙල් පෝලිමේ සිටියදී, ඩුබායි රටේ තියෙන, වෙබ් එකක්වත් නැති ආයතනයකට තෙල් ගේන්න ගිවිසුම් ගහලා. කිසිම විවෘත ටෙන්ඩරයක් නැතිව තමයි දීලා තියෙන්නේ. තෙල් වලට භාගයක් ඩොලර්වලින් ගෙවලා, ඉතිරි බාගය රුපියල්වලින් ගෙවන්න හදනවා. ලෝකයේ මොන රටේද තෙල් වලට රුපියල් වලින් ගෙවන්නේ.
මිනිස්සුන්ට කන්න නැතිව ඇද වැටෙන වෙලාවක මෙන්න කරන ඩීල්. මේක තවත් ලොකු ගේම් එකක්.”
