රනිල් වික්‍රමසිංහ මහතාගේ නිවසට ගිනිතැබීමේ සිද්ධියට සම්බන්ධ සැකකරුවන් 04 දෙනෙක් රක්ෂිත බන්ධනාගාරගත කිරීමට අද (20) කොළඹ කොටුව මහෙස්ත්‍රාත් තිළිණ ගමගේ මහතා නියම කළා.
එම සැකකරුවන් අතරින් 03 දෙනෙකු හඳුනාගැනීමේ පෙරෙට්ටුවක් සඳහා යොමු කරන ලෙසද කොටුව මහෙස්ත්‍රාත්වරයා නියෝග කළා.
එහෙත් ප්‍රමාණවත් වේලාවක් නොමැතිවීම හේතුවෙන් එම පෙරට්ටුව අද දින පවත්වීමට නොහැකි බැවින් එය ලබන 27 වනදා දක්වා කල්තැබුණා.
ඒ අනුව අදාළ සැකකරුවන් ලබන 27 වනදා දක්වා රක්ෂිත බන්ධනාගාර කිරීමට තිළිණ ගමගේ මහතා නියෝග කළා.
විත්තිය වෙනුවෙන් පෙනී සිටි නීතිඥවරුන් අධිකරණය හමුවේ ඉල්ලීමක් කරමින් මෙම සිද්ධියට සම්බන්ධ ප්‍රධාන සැකකරුවන් තවමත් නිදැල්ලේ සිටින බවත් ඔවුන් මේ දක්වා අත්අඩංගුවට ගෙන නොමැති බවත් පෙන්වා දුන්නා.
විත්තියේ නීතිඥවරුන් මතු කළ කරුණු සම්බන්ධයෙන් අදහස් පළ කළ අපරාධ පරීක්ෂණ දෙපාර්තමේන්තු නිලධාරින් සඳහන් කළේ එම සිද්ධිය සඳහා ප්‍රශ්න කිරීමට අවශ්‍යව සිටින ඉවන් පෙරේරා නමැත්තෙකු මේ වනවිට රටින් පිටව ගොස් ඇති බවත් ඔහු සම්බන්ධයෙන් ගුවන්තොටුපොළ බලධාරීන් දැනුවත් කිරීමට පියවර ගෙන ඇති බවත්ය.
එහිදී මහෙස්ත්‍රාත්වරයා ප්‍රකාශ කළේ මෙම සිද්ධියට අදාළව සීසීටීවී දර්ශන හා රූපවාහිනි නාලිකාවලින් දර්ශන ලබාගෙන විමර්ශන සිදුකරන ලෙස තමන් දැනටමත් අපරාධ පරීක්ෂණ දෙපාර්තමේන්තුවට නියෝග නිකුත් කර ඇති බවයි.
