නව ජනාධිපතිවරයා ලෙස තේරී පත්වූ රනිල් වික්‍රමසිංහ මහතාද ධූරයෙන් ඉල්ලා අස්වී ගෙදර යන තුරු අරගලය අඛණ්ඩව පවත්වාගෙන යන බව ගාලුමුවදොර මහජන අරගලයේ නිරතවන්නන් පවසනවා.
අද පාර්ලිමේතුව තුළ සිදුවිය යුතුව තිබුනේ ජනතාවාදී පාලකයෙකු පත්කරගැනීම බවත්, නමුත් සිදුවූයේ පාර්ලිමේන්තුවේ කිහිප දෙනෙකු ඔවුන්ගේ නිරුවත වසා ගැනීම සඳහා ඔවුන්ට වුවමනා ජනතා විරෝධී ජනාධිපතිවරයකු පත් කරගැනීම බවත් ඔවුන් පෙන්වා දෙනවා.
අරගලයේ ක්‍රියාකාරී සැලැස්මේ දෙවැනියට දක්වා ඇති පරිදි, මහජන කැමැත්තට පටහැනිව පත්වූ රනිල් වික්‍රමසිංහ ඉල්ලා අස්විය යුතු බවත්, එතෙක් සාමකාමී විරෝධතා අඛණ්ඩව සිදු කරන බවත් අද (20) පස්වරුවේ පැවති ප්‍රවෘත්ති සාකච්ඡාවකදී ඔවුන් සදහන් කළා.
මේ අතර ගාලු මුවදොර එස්.ඩබ්.ආර්.ඩී බණ්ඩාරනායක පිළිරුව පිහිටි ස්ථානයේ සිට මීටර් 50ක ප්‍රදේශයට ඇතුල්වීම වළක්වාලමින් කොළඹ කොටුව මහේස්ත්‍රාත් අධිකරණය නියෝගයක් නිකුත් කර තිබෙනවා
එම පිළිමයට හානි කිරීමේ සූදානමක් ඇති බවට තොරතුරු ලැබී ඇති බවට පොලීසිය විසින් කරන ලද දැනුම්දීමක් සළකා බැලීමෙන් අනතුරුව කොටුව මහේස්ත්‍රාත් අධිකරණය මෙම නියෝගය නිකුත් කළා.
