අමෙරිකාවේ බෝල්ටිමෝ වරායේ යාත්‍රා කළ නෞකාවක් ෆ්‍රැන්සිස් ස්කොට් කී පාලමෙහි ගැටී සිදු වූ අනතුරින් 6 දෙනෙකු මියගොස් ඇති බවට විදෙස් මාධ්‍ය වාර්තා පවසනවා.
අමෙරිකානු වෙරළාරක්ෂක බලකාය පවසන්නේ, එම පිරිස අතුරුදන් වී ඇති කාලය සහ එම ප්‍රදේශයේ ජලයේ උෂ්ණත්වය අනුව බලධාරීන් එම නිගමනයට පැමිණි බවයි.
එලෙස ජලයට වැටී ඇත්තේ, පාලම මත ප්‍රතිසංස්කරණ කටයුතු සිදු කරමින් සිටි කම්කරුවන් 6 දෙනෙක්.
වෙරළාරක්ෂක බලකාය මේ වන විට සෙවීම් සහ ගලවා ගැනීමේ මෙහෙයුම අත්හිටුවා ඇති බවට විදෙස් මාධ්‍ය වාර්තා පවසනවා.
නෞකාවේ විදුලි බලය අක්‍රීය වීමත් සමග තත්පර 30කින් පමණ එහි පාලනය සම්පූර්ණයෙන්ම ගිලිහී යාම අනතුරට හේතුව ලෙස අනාවරණ වී තිබෙනවා.
දිගින් මීටර් 300ක් වන අදාල බහාලුම් නෞකාව ඊයේ (26) අනතුරට පත්වුණේ ශ්‍රී ලංකාවේ කොළඹ වරාය බලා යාත්‍රා කරමින් තිබියදී.
