කොවිඩ් ආසාදිත ගර්භණී කාන්තාවක් දරුවා ප්‍රසූත කිරීමෙන් පසු ඇති වූ සංකූලතා හේතුවෙන් ඊයේ (14) කුරුණෑගල ශික්ෂණ රෝහලේදී මියගොස් තිබෙනවා.
මෙම කාන්තාව කොබෙයිගනේ ප්‍රදේශයේ පදිංචිව සිටි 28 හැවිරිදි ගැබිනියක් වූ බවත් ඇය දරු ප්‍රසූතිය සඳහා නිකවැරටිය රෝහලට ඇතුළත් කර පසුව කුරුණෑගල රෝහලට මාරුකර එවා තිබූ බවත් කුරුණෑගල ශික්ෂණ රෝහලේ නියෝජ්‍ය අධ්‍යක්ෂ වෛද්‍ය චන්දන කැන්දගමුව මහතා සඳහන් කරනවා.
ඇයට සිදුකළ PCR පරීක්ෂාවේදී කොවිඩ් ආසාදනය වී ඇති බවට හෙළිවී ඇති අතර අපස්මාර රෝගී තත්වයෙන්ද පෙළී ඇති බැවින් දරු ප්‍රසූතිය සඳහා සිසේරියන් සැත්කමක් සිදුකර තිබෙනවා.
එහිදී අපස්මාර රෝගී තත්ත්වය උත්සන්නවීමත් සමග ඇතිවූ සංකූලතා හේතුවෙන් මව ජීවිතක්ෂයට පත්වුණා.
කෙසේ වෙතත් දරුවා බේරාගැනීමට වෛද්‍යවරුන් සමත්ව තිබෙනවා.
මේ වනවිට දරුවා සෞඛ්‍ය සම්පන්නව නව ජන්ම ළදරු ඒකකයේ ප්‍රතිකාර ලබමින් සිටින බව කුරුණෑගල ශික්ෂණ රෝහලේ නියෝජ්‍ය අධ්‍යක්ෂවරයා සඳහන් කරනවා.
