මේ අවස්ථාවේදී ජනතාවට අවශ්‍ය වන්නේ තුන්වේලට අවශ්‍ය ආහාර සපයා ගැනීම බව වරාය සහ නාවික අමාත්‍ය රෝහිත අබේගුණවර්ධන මහතා පවසනවා.
ඒ, ඊයේ (10) පැවති මාධ්‍ය හමුවක් අමතමින්.
ඇපල්, චීස්, බටර්, ෆෝන් ඇතුළුව අධිසුඛෝපභෝගී භාණ්ඩ රැසකට ආනයන සීමා පැනවූ නමුත්විපක්ෂය අවධානය යොමු කරන්නේ යට ඇඳුම් වෙත පමණක් බවයි ඔහු පවසන්නේ.
“ඒවා අවශ්‍යයි. ඒත් මේ වෙලාවේ අවශ්‍ය නොවන භාණ්ඩ රාශියක් තිබුණා. එතකොට මේකෙන් තෝරගත්තේ යට ඇඳුම දැන් මට තියෙන ප්‍රශ්නය ලංකාවේ යට ඇඳුම් මහන්නේ නැද්ද? ලංකාවේ යට ඇඳුම් මහනවා. අර මහරගම පමුණුවේ යට ඇඳුම් තියෙනවා.” යැයි ඔහු පවසයි.
ස්ථාවර හා ජංගම දුරකතන, විදුලි පංකා, රූපවාහිනි යන්ත්‍ර, ශීතකරණ, රෙදි සෝදන යන්ත්‍ර, ඩිජිටල් කැමරා, ළඳරු ඇඳුම්, යට ඇඳුම්, රබර් ටයර්, වායු සමීකරණ යන්ත්‍ර, ඇපල්, මිදි, පලතුරු යුෂ, බියර්, වයින්, චොකලට්, චීස්, බටර්, දුම්කොළ නිෂ්පාදන ඇතුළු භාණ්ඩ රැසක් අත්‍යවශ්‍ය නොවන තෝරාගත් භාණ්ඩ ගණයෙහි ලා සලකා ඒවා ආනයනය කිරීමේ දී 100% ආන්තික මුදල් තැන්පතු වහාම ක්‍රියාත්මක වන පරිදි පැනවීමට මුදල් මණ්ඩලය තිරණය කර ඇතැයි ශ්‍රී ලංකා මහ බැංකුව පෙරේදා (09) නිවේදනය කර සිටියා.
විනිමය අනුපාතිකයේ ස්ථාවරභාවය සහ විදේශ මුදල් වෙළෙඳපොළේ ද්‍රවශීලතාව රැක ගැනීමේ අරමුණින් මෙම ක්‍රියාමාර්ගය ගත් බවයි එහිදී ශ්‍රී ලංකා මහ බැංකුව සඳහන් කර සිටියේ.
