වනජීවී දෙපාර්තමේන්තුව භාරයේ සිටි අලි ඇතුන් 14 දෙනෙකු ඔවුන්ගේ මුල් අයිතිකරුවන් වෙත යළි මුදාහරින ලෙස කොළඹ අතිරේක මහෙස්ත්‍රාත් එස්. ප්‍රභාකරන් මහතා පසුගියදා නියෝගයක් නිකුත් කළා.
ඒ වනජීවී දෙපාර්තමේන්තුවේ තිබූ අලින් ලියාපදිංචි කිරීමේ පොත කූඨ ලෙස වෙනස් කර බලපත්‍ර නොමැති අලීන් සන්තකයේ තබාගත් සිද්ධියක් සම්බන්ධයෙන් අපරාධ පරීක්ෂණ දෙපාර්තමේන්තුව 2016 වසරේදි පවරන ලද නඩුවකට අදාළ තීන්දුව ප්‍රකාශයට පත්කරමින්.
අදාළ නියෝගය නීතිය වැරදි ලෙස වටහා ගනිමින් දුන් දෝෂ සහගත නියෝගයක් සේ සලකා එය ඉවත් කරගන්නා ලෙස ඉල්ලමින් නීතිඥවරු දෙදෙනෙකු හා පරිසර සංවිධාන විසින් එම නියෝගය ආපසු කැඳවන ලෙස මෝසමක් මාර්ගයෙන් සිදුකර තිබූ ඉල්ලීමක් කොළඹ අතිරේක මහෙස්ත්‍රාත් එස්. ප්‍රභාකරන් මහතා අද (16) ප්‍රතික්ෂේප කළා.
මේ සම්බන්ධයෙන් සිය තීරණය ප්‍රකාශයට පත්කළ කොළඹ අතිරේක මහෙස්ත්‍රාත්වරයා සඳහන් කර සිටියේ, අදාළ අලි ඇතුන් 14 දෙනා ඔවුන්ගේ මුල් අයිතිකරුවන් වෙත මුදාහරින ලෙස දන්වමින් තමන් විසින් ඉකුත් 6වන දා ප්‍රකාශයට පත් කෙරුණු නියෝගය තවදුරටත් බලාත්මක වන බවයි.
අතිරේක මහෙස්ත්‍රාත්වරයා ප්‍රකාශ කළේ මෙම නඩු කටයුත්ත ඉදිරියට පවත්වාගෙන යාම සිදුනොකරන බවට අපරාධ පරීක්ෂණ දෙපාර්තමේන්තුව දැනුම්දීමෙන් අනතුරුව තමන් මෙම නියෝගය කළ බවයි.
තමාගේ මෙම තීන්දුව සම්බන්ධයෙන් කිසියම් පාර්ශ්වයක් අතෘප්තියට පත් වන්නේ නම් ඉහළ අධිකරණයකට අභියාචනා ඉදිරිපත් කිරීමට හැකියාව පවතින බවද බවද කොළඹ අතිරේක මහෙස්ත්‍රාත් එස්. ප්‍රභාකරන් මහතා පවසා සිටියා.
