කොවිඩ් 19 තත්ත්වය තුළ බොහෝ කටයුතු පවත්වාගෙන යමින් තිබියදී රටේ ජනතාවගේ ප්‍රවාහන කටයුතු සඳහා දායක වන දුම්රිය සේවය පමණක් ධාවනය කිරීම දිගින් දිගටම කල්දමන හේතුව ප්‍රවාහන අමාත්‍යවරිය විසින් රටට පැහැදිලි කළ යුතු බව දුම්රිය වෘත්තීය සමිති සන්ධානය පවසනවා.
මේ මස 01 වැනිදා සිට දුම්රිය ධාවනය කිරීමට සැලසුම් කර තිබුණු බවත්, පසුව එය මේ මස 14 වැනිදා දක්වා කල් දැමූ බවත් එම සන්ධානයේ ප්‍රධාන ලේකම් එස්.පී. විතානගේ මහතා සදහන් කරනවා.
කෙසේ වෙතත් දුම්රිය ධාවන කටයුතු යළිත් වරක් කලාදමා තිබෙන බවත් මෙමගින් දුම්රිය මගීන්ට දැඩි අසාධාරණයක් සිදුවන බවත් ඔහු පෙන්වා දෙනවා.
දුරගමන් සේවා බස් රථ ධාවනය නොවූවත් පළාත් තුළ බස් රථ සේවා පවත්වාගෙන යන්නේ නම් දුම්රිය ධාවනය සඳහාත් ක්‍රමවේදයක් සකස් කළ යුතු බවත් විතානගේ මහතා පවසනවා.
කොවිඩ් තත්ත්වය තුළ පවා දුම්රිය සේවකයින් සේවයට වාර්තා කරන බැවින් දුම්රිය ධාවනය කිරීමේ කටයුතු සිදුකිරීමට කිසිදු බාධාවක් නොමැති බවත්, එවැනි තත්ත්වයක් තුළ පවා දුම්රිය ධාවනය නොකර සිටින්නේ ඇයිදැයි යන්න ගැටළුකාරී තත්ත්වයක් බවත් ඔහු පෙන්වා දෙනවා.
