හෙට සිට ශ්‍රී ලංකා යුද හමුදාවෙන් ශ්‍රී ලංකා පොලීසියට කෑම ලෙස විශ්‍රාමික මේජර් ජෙනරාල් චාගි ගාල්ලගේ මහතා සිය ෆේස්බුක් ගිණුමේ සටහනක් තබා තිබෙනවා.
කෑම යනු ආහාරද ප්‍රහාරයක්ද යන්න එතුමා පැහැදිලි කර නැහැ.
චාගි ගාල්ලගේ මහතා එහි සටහන් කර ඇත්තේ මෙය නොදන්න ටිංකිරි වලට කහින බයියන්ගේ දැනගැනීම පිණිස පළකල එකක් බවයි.
ශ්‍රී ලංකා පොලීසියේ නිලධාරීන් දෙදෙනෙකු විසින් අද (05) පස්වරුවේ පාර්ලිමේන්තුව අසළ පැවති විරෝධතාවයට පැමිණි ශ්‍රී ලංකා යුද්ධ හමුදා යතුරු පැදි කණ්ඩායමට අයත් යතුරු පැදි හතරකට බාධා එල්ලකර නොමනා ලෙස හැසිරුණු බවට යුද හමුදාපතිවරයා විසින් පොලිස්පතිවරයාව දැනුවත් කර ඇති පසුබිමක චාගි ගාල්ලගේ මහතා මෙම සටහන තබා තිබීම විශේෂත්වයක්.
විශ්‍රාමික මේජර් ජෙනරාල් චාගි ගාල්ලගේ මහතා යනු අවසන් සටනේදී 55 වන සේනාංකාධිපති ලෙස කටයුතු කළ පුද්ගලයායි.
ඔහුට ජාත්‍යන්තරය විසින් යුද අපරාධ චෝදනා එල්ලකර ඇති අතර 2017 මාර්තු 22 දා තම සොහොයුරා බැලීමට ඕස්ට්‍රේලියවට යාමට සූදානම් වූ මොහොතේ ඔහුට වීසා ලබාදීම ඕස්ට්‍රේලියා මහකොමසාරිස් කාර්යාලය විසින් ප්‍රතික්ෂේප කළා.
හිටපු ජනාධිපති මහින්ද රාජපක්ෂ මහතා 2010 නොවැම්බරයේ එංගලන්තයේ ඔක්ස්ෆර්ඩ් සරසවියේ දේශනයකට ගිය මොහොතේ ජනාධිපති ආරක්ෂක සේනාව භාරව ගිය චාගී ගාල්ලගේ යුද අපරාධකරුවකු ලෙස අත්අඩංගුවට ගැනීමට සූදානමක් පැවතියා.
එහිදී සංචාරයද අතරමැද නවතා දමා ලන්ඩනයෙන් විශේෂ ගුවන් යානයකින් නැවත මෙරටට පැමිණීමට මහින්ද රාජපක්ෂ මහතාට සිදුවුණා.
