ගලෙන්බිදුණුවැව ප්‍රදේශයේ දී සිදුවූ අනතුරකින් පාසල් සිසුන් 13 දෙනෙකු තුවාල ලබා රෝහල්ගත කර තිබෙනවා.
ප්‍රවාහන පහසුකම් නොමැතිවීම හේතුවෙන් ලොරි රථයකින් පාසල වෙත ගමන් කරමින් සිටියදී ලොරි රථයේ පිටුපස කොටස කඩා වැටී ඊයේ (30) උදැසන මෙම අනතුර සිදුව ඇති බවයි වාර්තා වන්නේ.
එම අවස්ථාවේදී සිසුන් 37 දෙනෙකු ලොරි රථයේ ගමන් කර ඇති අතර ඉන් 13 දෙනෙකු මෙලෙස තුවාල ලැබුවා.
ප්‍රදේශවාසීන් විසින් තුවාල ලැබූ සිසුන්ව ගලෙන්බිදුණුවැව රෝහලට ඇතුළත් කර ඇති අතර පසුව සිසුන් තිදෙනෙකුව වැඩිදුර ප්‍රතිකාර සඳහා අනුරාධපුර ශික්ෂණ රෝහලට මාරුකර යවා තිබෙනවා.
සිදුකළ විමසීමකදී ගලෙන්බිදුණුවැව රෝහලේ ප්‍රකාශකවරයෙකු පැවසුවේ එක් සිසුවෙකුගේ පාදයට අනතුරින් දැඩිව හානි සිදුව ඇති බවයි.
