ලෝකයේ බලගතු රටවල්වලට වඩා කොවිඩ් නයින්ටීන් වෛරස් ව්‍යාප්තිය සාර්ථකව පාලනය කිරීමට ශ්‍රී ලංකාවට හැකියාව ලැබී ඇති බව යුද හමුදාපති ජනරාල් ශවේන්ද්‍ර සිල්වා මහතා පවසා ඇත.
මාතලේ දිස්ත්‍රික් විශ්‍රාමික යුද හමුදා හොකී සංගමය මගින් මාතලේ නගරයේ ඉදිකළ හොකී ස්මාරකය විවෘත කිරීමේ අවස්ථාවට එක්වීමෙන් අනතුරුව මාධ්‍ය වෙත අදහස් දක්වමින් ඒ මහතා මෙසේ පවසා ඇත.
“මේ දවස්වල 500කට ආසන්න සංඛ්‍යාවක් දිනකට හමුවෙනවා. නමුත් ලෝක තත්ත්වයත් සමග ගත්තහම අපිට බය නැතුව කොවිඩ් අපි පාලනය කරගෙන ඉන්නවා කියන එක කියන්න ඕනේ. රටේ ජනතාවගේ සහයෝගය මේ සඳහා ඉතාමත් අවශ්‍යයි. අපේ ජනතාව බුද්ධිමත් ජනතාවක්. සෑම අවස්ථාවකම කොවිඩ් පැතිරීම වැළැක්වීම සඳහා ගතයුතු ක්‍රියාමාර්ග ගත්තත් ඉතාමත් සුළු පිරිසක් මේ සඳහා කටයුතු කරන ආකාරයට අනුව සමහ අවස්ථාවලදී අපි දකිනවා වර්ධනය වීමක්, අඩුවීමක්. අපි ජීවත් විය යුත්තේ මේකත් එක්ක. ලෝක තත්ත්වයත් එක්ක බැලුවහම ලෝකයේ ප්‍රබල රටවල් මේ අවස්ථාවේ දී දණින් වැටිලා තියෙනවා. ඊයේ දිනයේ දී අමෙරිකාවේ මෙතෙක් දිනකට මියගිය වැඩිම පිරිස ඊයේ දිනයේ දී වාර්තා වුණා. එවන් අවදියක අපිට හැකි වුණා ශ්‍රී ලංකාව තුළ කොවිඩ් පාලනය කරගෙන අරන් යන්න. අපි ජනතාවගෙන් මේ සඳහා සහයෝගය බලාපොරොත්තු වෙනවා.“ යැයි ඒ මහතා පවසා තිබුණි.
