නාවල පාරේ, සේනානායක මාවත අසල අනවසර ඉදිකිරීමක් හේතුවෙන් ප්රදේශවාසීන් දැඩි අපහසුතාවයට පත්ව ඇති බවට තොරතුරු වාර්තා වනවා.
සේනානායක මාවත වෙත නාවල පාරෙන් හැරෙන මංසන්ධියේ ඉදිකර ඇති ගොඩනැගිල්ල හේතුවෙන් සේනානායක මාර්ගයද මේ වන විට අවහිර වී ඇති බවටයි ප්රදේශවාසීන් චෝදනා කරන්නේ.
මෙම ඉඩම හිටපු නාගරික මන්ත්රී ඔල්බන් පෙරේරා මහතාට අයත්ව තිබූ අතර මේ වන විට ඔහුගේ දියණියගේ සැමියා වන මේ දිනවල දැඩි කතාබහකට ලක්ව තිබෙන සීනි ආනයනයට සම්බන්ධ ව්යාපාරිකයා සතුවනවා.
ඒ අනුව මෙම ඉඩමේ මේ වන විට සුපිරි වෙළෙදසැලක් ඉදිකර තිබෙන අතර මෙම ඉදිකිරීම අනවසර එකක් බවටයි ප්රදේශවාසීන් පවසන්නේ.
මේ පිළිබදව නිවුස් 19 කළ සොයාබැලීමේදී වාර්තා වූයේ අංක 280/A, නාවල පාර නාවල යන ස්ථානයේ සිදුකරමින් පැවති අදාල ඉදිකිරීම සම්බන්ධයෙන් ශ්රී ජයවර්ධනපුර කෝට්ටේ මහනගර සභාවද මැදිහත්වී ඇති බවයි.
ඒ අනුව 2018-09-13 වන දින වැලිකඩ පොලීසියේ ස්ථානාධිපතිවරයාට ලිපියක් යොමුකරමින් ශ්රී ජයවර්ධනපුර කෝට්ටේ මහනගර සභාවේ නාගරික ඉංජිනේරුවරයා දැනුම්දී ඇත්තේ මෙම ඉදිකිරීමට අදාල මානක හා ගොඩනැගිලි සැලසුම් ඉදිරිපත් කර නොමැති නිසාවෙන් අදාල ඉදිකිරීම අනවසර එකක් බවයි.
එමෙන්ම අදාල ඉදිකිරීම සම්බන්දයෙන් නාගරික මන්ත්රී සමිත ඉමදූවගේ මහතා 2018 වසරේදී ශ්රී ජයවර්ධනපුර කෝට්ටේ මහනගර සභාවෙදී නගන ලද ප්රශ්නයකට පිළිතුර ලෙස නාගරික ඉංජිනේරුවරයා දක්වා ඇත්තේ SJKMC/අගඉ/CN/54/2018 යනුවෙන් අනවසර ලිපිගොනුවක් මෙම කරුණ සම්බන්දව පවතින බවයි.
ඒ අනුව මෙම පරිශ්රයට අදාලව ලැබී ඇති පැමිණිල්ල අනුව තාක්ෂණ නිලධාරී විසින් ස්ථානීය පරීක්ෂාවක් සිදුකර එහි ඉදිකිරීමට අදාලව අනුමත සැලසුම් දින 14 ක් ඇතුළත ලබාදෙන ලෙස දන්වා ඇතිමුත් එය ඒ වන තෙක් ලබා නොදුන් බවයි.
එමෙන්ම දළ සටහන් සදහා මිනුම් කටයුතු කිරීමට තාක්ෂණ නිලධාරීන් අවස්ථා කිහිපයකදීම අදාළ පරිශ්රය වෙත ගියද කිසිවෙකු එහි නොසිටි බැවින් ඉදිරි කටයුතු කිරීමට නොහැකිවී ඇති බව අදාල ලිපියෙහි දක්වා තිබෙනවා.
ඒ අනුව ඉන් වසර දෙකක් ඉක්මෙන වර්තමානය වන විට අදාල ඉඩමෙහි අනවසර ඉදිකිරීමක් සිදුකර එහි සුපිරි වෙළෙඳ සංකීර්ණයක් පවත්වාගෙන යාමට ඉඩමේ හිමිකරුවන් අදාල පාර්ශව වෙත අවස්ථාව හිමිකර දී තිබෙනවා.