ආන්දෝලනාත්මක චීන පර්යේෂණ නෞකාව මේ වන විට හම්බන්තොට වරාය වෙත පැමිණ තිබෙනවා.
මෙරට විදේශ කටයුතු අමාත්යාංශය ලබාදුන් අවසරය මත යුවාන් වෑන්ග් -5 නමැති මෙම පර්යේෂණ නෞකාව මෙරටට ඇතුළු වුණා.
පසුගිය 11 වනදා එම නෞකාව මෙරටට ළඟාවීමට නියමිතව තිබුණත් ඉන්දියාවේ දැඩි විරෝධය මත යුවාන් වෑන්ග් -5 නෞකාව මෙරටට පැමිණීම ප්රමාද වුණා.
චීනය සඳහන් කළේ මෙම නෞකාව ආහාර සහ ඉන්ධන ඇතුළු මූලික පහසුකම් සපයාගැනීම සඳහා පමණක් මෙරටට පැමිණෙන බවයි.
කෙසේවෙතත් අදාළ නෞකාව ඔත්තු බැලීමේ අරමුණින් ශ්රී ලංකා වරාය වෙත පැමිණෙන බවට ඉන්දියාව චෝදනා කර තිබුණා.
ඇතිවූ මතභේදාත්මක තත්ත්වය හමුවේ චීන නෞකාවේ මෙරට සංචාරය කල් දමන ලෙස විදේශ කටයුතු අමාත්යාංශය පසුගිය 10 වැනිදා චීන බලධාරීන්ගෙන් ඉල්ලීමක් සිදුකර තිබුණත් ඊට චීනයේ විරෝධය එල්ල වුණා.
පසුගිය 12 වනදා චීනයේ නිෂ්පාදිත පාකිස්ථාන යුද නෞකාවක් වන PNS Taimur නෞකාවද කොළඹ වරායට පැමිණියා.
මෙම නෞකා අර්බුදය හේතුවෙන් මේ වන විට මෙරට විදේශ ප්රතිපත්තියද අර්බුදයකට ලක්ව තිබෙනවා.