මුහුණු පොත හරහා ජනාධීපතිවරයාට අපහාස කළායැයි අත්අඩංගුවට ගත් ෆසාල් මොහොමඩ් නිසාර් මහතාව වහාම අපරාධ පරීක්ෂණ දෙපාර්තමේන්තුවට භාර දෙන ලෙස කොළඹ ප්‍රධාන මහෙස්ත්‍රාත් මොහොමඩ් මිහාර් මහතා ජනවාරි (18) බන්ධනාගාර අධිකාරීවරයාට නියෝගයක් ලබා දී ඇත.
අපරාධ පරීක්ෂණ දෙපාර්තමේන්තුවේ නිලධාරීන් මෝසමක් මාර්ගයෙන් අධිකරණය හමුවේ කරුණු දක්වමින් පවසා ඇත්තේ සැකකරුගේ බැංකු ගිණුම් හරහා සැකකටයුතු ලෙස විශාල මුදලක් සංසරණය වී ඇති බවය.
එබැවින් ඔහුව දින 90ක කාලයක් පොලීසිය භාරයේ රඳවාගෙන ප්‍රශ්න කිරීම සඳහා ආරක්ෂක අමාත්‍යංශ ලේකම් රැඳවුම් නියෝගයක් නිකුත්කර ඇති බව පවසා ඇත.
ඒ අනුව සැකකරුව අපරාද පරීක්ෂණ දෙපාර්තමේන්තුව භාරයට පත්කරන මෙන් බන්ධනාගාර අධිකාරිවරයාට නියෝගයක් නිකුත් කරන ලෙස අධිකරණයෙන් ඉල්ලා ඇත.
ඒ අනුව රක්ෂිත බන්ධනාගාරගත කර සිටින අදාළ සැකකරු අපරාධ පරීක්ෂණ දෙපාර්තමේන්තුවට භාරදෙන ලෙස බන්ධනාගාර අධිකාරිවරයාට නියෝග කර තිබුණී.
අපරාධ පරීක්ෂණ දෙපාර්තමේන්තුවේ නිලධාරීන් අධිකරණය හමුවේ කරුණු දක්වමින් පවසා ඇත්තේ මෙම සැකකරුගේ බැංකු ගිණුම් පරික්ෂා කිරීමේ දී ඒ හරහා පසුගිය කාලයේ රුපියල් ලක්ෂ 625 කට අධික මුදලක් සැකකටයුතු ලෙස සංසරණය වී තිබෙන බව අනාවරණය වී ඇති බවය.
අදාල පුද්ගලයාගේ නිවසේ කුලීය වශයෙන් මාසිකව රුපියල් 80,000/- ක්ද කුලී පදනම වශයෙන් ලබාගත් වාහනය සඳහා මාසිකව රුපියල් 50,000ක මුදලක් ද කුලියට ලබාගත් වෙළෙඳසැලක් සඳහා මාසිකව රුපියල් 125,000ක මුදලක් ද ගෙවන බව අපරාධ පරීක්ෂණ දෙපාර්තමේන්තුවේ නිලධාරීන් අධිකරණය හමුවේ පවසා ඇත.
ජාතීන් අතර නොසන්සුන්තාවක් ඇතිවන ආකාරයෙන් වෛරී ප්‍රකාශ නිකුත් කළා යැයි වරදට අදාල පුද්ගලයාව පසුගිය ජනවාරි 12 දින අත්අඩංගුවට ගෙන තිබුණී. නමුත් ඔහු සැකකටයුතු ආකාරයෙන් මුදල් උපයාගෙන ඇති බව පවසමින් ආරක්ෂක අමාත්‍යංශයෙන් රැඳවුම් නියෝග නිකුත් කර ඇත්තේ ත්‍රස්තවාදය වැලැක්වීමේ පනත යටතේ බව වාර්තා වේ.
