මෙරට ජනතාවගේ විරෝධය හමුවේ ශ්‍රී ලංකාවෙන් පලාගිය හිටපු ජනාධිපති ගෝඨාභය රාජපක්ෂ මහතා ඊයේ (10) තායිලන්තයේ බැංකොක් නුවරට පැමිණි බව රොයිටර් පුවත් සේවය වාර්තා කරනවා.
ඔහු හා ඔහුගේ බිරිද වන අයෝමා රාජපක්ෂ මහත්මිය තායිලන්තයට පැමිණ මෝටර් රථයක නැගී ගුවන්තොටුපලෙන් පිටව යන ආකාරය විදෙස් මාධ්‍ය ඡායාරූප ඇසුරෙන් ප්‍රසිද්ධියට පත්කර තිබුණා.
එම අවස්ථාවේදී අයෝමා රාජපක්ෂ මහත්මියගේ අතෙහි ඇති රතු නූල පිළිබදව මේ වන විට සමාජ මාධ්‍ය තුළ කතාබහක් ඇතිව තිබෙනවා.
ඒ, එම රතු නූල කුප්‍රකට සාස්කරකාරියක වන ඥාණක්කා විසින් ලබාදුන් එකක් වීම හේතුවෙන්.
අදාළ රතු නූල් ගෝඨාභය රාජපක්ෂ මහතාත්, හිටපු හමුදාපති ශවේන්ද්‍ර සිල්වා මහතා හා ඔහුගේ බිරිදත් ඇතුළු මැති ඇමතිවරුන් ගණනාවක් කලක පටන් අතෙහි බැඳ තිබෙන අයුරු දක්නට ලැබුණා.
කෙසේවෙතත් මැයි 09 වනදා ඥාණක්කාගේ නිවසට, දේවාලයට හා හෝටලයට ගිනි තැබීමේ සිදුවීමෙන් අනතුරුව ඇය චෝදනා කළේ එවක තම දේවාලයට ආගිය කිසිදු මැති ඇමතිවරයෙකු හෝ ආරක්ෂක අංශ ප්‍රධානියෙකු තමන්ට සිදුවූ විපත පිළිබදව සොයාබැලීමට නොපැමිණි බවයි.
එමෙන්ම ඔවුන් කිසිවෙක් මේ වන විට තම සරණ පතා දේවාලයට නොපැමිණෙන බවත්, ගම්වැසියන්ගේ ආධාරයෙන් නැවතවරක් සිය දේවාලය ගොඩනගන බවත් ඥාණක්කා මාධ්‍ය වෙත පවසා තිබුණා.
එවන් තත්ත්වයක් තුළ හිටපු ජනාධිපතිවරයාගේ බිරිද තවදුරටත් ඥාණක්කාගේ දේවාලය බැති සිතින් විශ්වාස කොට ඇයගේ රතු නූල පැළද සිටීම විශේෂත්වයක්.
