සිසුන් 200ට වඩා අඩුවෙන් ඉගෙනුම ලබන පාසල් යළි විවෘත කිරීමට රජය විසින් ගත් තීරණය අනුව, හෝමාගම ප්‍රදේශයේ පාසල් වල වර්තමාන තත්වය සම්බන්ධ නිරීක්ෂණ කටයුතු සිදුකිරීමට වෙළෙඳ අමාත්‍ය ආචාර්ය බන්දුල ගුණවර්ධන මහතා ඊයේ (16) එක්ව සිටියා.
ලොව පුරා හදිසි තත්වයක් ඇති වීමත් සමඟම වසා දැමුණු පාසල්, යළිත් සිසු දරුවන් වෙනුවෙන් විවෘත කිරීමේ කිරීමට පෙර ඒ ඒ පාසැල් භූමිය හා ගොඩනැගිලි වල පවිත්‍රතා කටයුතු ආදිය සිදු කළ යුතු ආකාරය පිළිබඳව මෙහිදී ප්‍රදේශයේ සිසු දරුවන්ගේ දෙමව්පියන්, ඒ ඒ පාසල් වන ගුරුභවතුන් හා විදුහල්පතිවරුන් එක්ව සාකච්ඡා කෙරුණු බව ඒ මහතාගේ මාධ්‍ය අංශය නිවේදනය කරනවා.
එහිදී අමාත්‍යවරයා මාධ්‍ය හමුවේ අදහස් දක්වමින් මෙලෙස අදහස් පලකළා.
“හෝමාගම අධ්‍යාපන කලාප‌යේ සිසු දරුවන් එකසිය හතළිහක් පමණ ඉගෙනුම ලබන දීපන්ගොඩ කණිෂ්ඨ විද්‍යාලය, වර්ෂයක කාල සීමාවක් සිසු දරුවන් පාසලට නොපැමිණීම තුළ මේ වන විට වල් බිහි වෙලා පන්ති කාමර දුර්වර්ණ වෙලා නැවත අධ්‍යාපනය ලබා දීමට සුදුසු නොවන තත්වයකට පත් වෙලා තිබෙනවා. එළඹෙන 21 වැනි දින පාසල පටන් ගැනීමට පෙර හෝමාගම ප්‍රාදේශීය සභාවේ මහජන නියෝජිතයන් විසින් හෝමාගම ප්‍රාදේශීය සභා බල ප්‍රදේශයේ සිසුන් 200ට වඩා අඩුවෙන් ඉගෙනුම ලබන සියළුම පාසල් වල පාසල් භූමි, පන්ති කාමර සකස් කිරීම සඳහා ශ්‍රමදානයක් පැවැත්වීමට කටයුතු සලසා තිබෙනවා. මෙම කටයුත්තට ඒ ඒ පාසලේ විදුහල්පතිවරුන්, ගුරුභවතුන්, ආදි ශිෂ්‍යයන් හා සිසුන්ගේ දෙමාපියන් ස්වේච්ඡාවෙන්ම සම්බන්ධ වනවා.”
එමෙන්ම මෙහිදී වැඩිදුරටත් අදහස් දැක්වූ අමාත්‍යවරයා ප්‍රකාශ කළේ, පුරා වසර 24ක් පමණ පැවති ගුරු වැටුප් විෂමතා සම්බන්ධයෙන් එළඹෙන වසර සඳහා වන අයවැය තුළින් ස්ථිර විසඳුමක් ලබා දීමට රජයේ වගකිවයුතු පාර්ශ්වයන් කටයුතු කරන බව දැනුම් දී තිබියදීත් තවදුරටත් වර්ජනය කරමින් සිසුන්ගේ අධ්‍යාපන අයිතිය අතකොළුවක් කරගත් වර්ජන රැල්ල හුදෙක්ම දේශපාලන න්‍යාය පත්‍රයකට අනුව සිදු වන්නක් වන බවයි.
කෙසේ වෙතත් පාසල් ශුද්ධ කරන මුවාවෙන් දෙමාපියන් ලවා ආණ්ඩුවේ දේශපාලඥයින් විදුහල්පතිවරුන්ගෙන් පාසලේ යතුරු ලබාගැනීමේ කූඨ උපක්‍රමයක්ද ක්‍රියාත්මක කෙරෙන බවට තොරතුරු වාර්තා වනවා.
ගුරු සංගම් චෝදනා කරන්නේ මේ වන තෙක් දරුවන්ගේ ඔන්ලයින් අධ්‍යාපනයට පවා නිසි ක්‍රමවේදයක් සැකසීමට අසමත්වූ ආණ්ඩුවේ දේශපාලඥයින් දැන් පාසල් විවෘත කිරීම සම්බන්ධයෙන් පුදුම සහගත සෙනෙහසකින් ක්‍රියාකරන බවයි.
