ඉස්ෆහාන් හෝ සිය රටේ කිසිදු ප්‍රදේශයකට ගුවන් ප්‍රහාරයක් එල්ල වී නොමැති බව ඉරානයේ ජාතික සයිබර් අවකාශ ආරක්ෂණ ඒකකය සඳහන් කර තිබෙනවා.
එම ඒකකය සඳහන් කළේ යම් පිරිසක් සිය ගුවන් අවකාශයට ඉහළින් ඩ්‍රෝන යාන පියාසර කිරීමේ නින්දිත උත්සාහයක් ගෙන ඇති බවයි.
ඒ අනුව, එවැනි ඩ්‍රෝන යාන තුනක් පමණක් බිඳ හෙළීමට කටයුතු කළ බව ඉරානය පවසනවා.
ඉස්ෆහාන් නගරයේ ගුවන් තොටුපළ සහ හමුදා කඳවුරක් ආසන්නයේ පිපිරීම් තුනක් ඇසුණු බව අද (19) උදෑසන වාර්තා වුණා.
ඇමරිකාව පවසා සිටියේ ඊශ්‍රායල විසින් ඉරානයට ගුවනින් මිසයිල ප්‍රහාරයක් එල්ල කර ඇති බවයි.
කෙසේවෙතත්, ඉරාන මාධ්‍ය පවසන්නේ ඉස්ෆහාන් නුවරින් ඇසුණු එම පිපිරුම් හඬ ගුවනේ පියාසර කළ සැකසහිත වස්තුවකට ඉරාන ගුවන් ආරක්ෂණ පද්ධතියෙන් කළ වෙඩි තැබීමකින් හට ගත් බවයි.
එරට ජ්‍යේෂ්ට හමුදා අණ දෙන නිලදාරියෙකුගේ ප්‍රකාශයක් උපුටා දක්වමින් ඉරාන මාධ්‍ය මේ බව වාර්තා කර තිබෙනවා.
ඉස්ෆහාන් පළාතේ ජ්‍යේෂ්ට හමුදා ප්‍රධානී ජෙනරල් මිහන්දවුස්ට් ප්‍රකාශ කර ඇත්තේ ඉස්ෆහාන්හි ගුවන් තොටුපොළට හෝ ඒ ආසන්න හමුදා කඳවුරට කිසිදු හානියක් සිදු නොවූ බවයි.
ඉරානයේ ටෙහෙරාන් නගරයට කිලෝ මීටර 350ක් දුරින් පිහිටා ඇති ඉසෆහාන් නගරය න්‍යෂ්ටික බලාගාර මෙන්ම ප්‍රධාන ගුවන් කඳවුරු කිහිපයකින්ද සමන්විත වෙනවා.
ඉරානය සඳහන් කරන්නේ ඉස්ෆහාන් නගරයේ න්‍යෂ්ටික බලාගාර මෙන්ම හමුදා කඳවුරුද ආරක්ෂිතව පවතින බවයි.
මේ අතර මැද පෙරදිග කලාපය තුළ මැදිහත් කරුවෙකු වශයෙන් කටයුතු කරන ඕමානය ඊශ්‍රායලය විසින් ඉරානයට එල්ල කළ ප්‍රහාරයට හෙළා දකිමින් නිවේදනයක් නිකුත් කර තිබෙනවා.
ඕමාන විදේශ අමාත්‍යංශය සඳහන් කර ඇත්තේ ඊශ්‍රායලය විසින් මැද පෙරදිග කලාපය වෙත වරින් වර එල්ල කරන ප්‍රහාරයන් හෙළා දකින බවයි.
අප්‍රේල් 13 වන දින ඉරානය විසින් ඊශ්‍රායලය වෙත ඩ්‍රෝන සහ මිසයිල ප්‍රහාර මාලාවක් දියත් කර තිබුණා.
පසුගිය අප්‍රේල් මස පළමුවන දින සිරියාවේ ඉරාන කොන්සල් කාර්යාලයට එල්ල වූ ප්‍රහාරයට ප්‍රතිප්‍රහාරයක් ලෙස ඉරානය විසින් මෙම ප්‍රහාරය එල්ල කර ඇති බව සඳහන් වෙනවා.
කෙසේවෙතත්, ඉරානය විසින් දියත් කළ ප්‍රහාරයට ප්‍රතිචාර දක්වමින් යළිත් ප්‍රහාර එල්ල කරන බවට ඊශ්‍රායලය දැනුම් දීමත් සමඟ ඉරානය ඒ පිළිබඳව දැඩි අවධානයෙන් පසු වෙනවා.
