රටේ පවතින ඉන්ධන අර්බුදයට එකම විසඳුම වන්නේ රුසියාවෙන් අඩු මිලට ඉන්ධන ලබා ගැනීම බව ජාතික නිදහස් පෙරමුණ පවසනවා.
එම පෙරමුණේ ජාතික සංවිධායක පාර්ලිමේන්තු මන්ත්‍රි ජයන්ත සමරවීර කොළඹ ඊයේ (05) පැවැති මාධ්‍ය හමුවකට එක්වෙමින් පෙන්වා දුන්නේ අගෝස්තු මස 15වැනිදායින් පසුව නැවතත් ඉන්ධන නෞකාවක් පැමිණෙන දිනයක් නිශ්චිත නොවන බව පෙනෙන්නට ඇති බවයි.
පසුගිය මැයි මාසයේදී රුසියානු සමාගමක් විසින් අඩු මිලට ඉන්ධන ලබා දීමට කැමැත්ත පල කළ බවත් ඒ අනුව එම සමාගම සමඟ සාකච්ඡාවක් පැවති සාකච්ඡාවේදී අවුරුදු 2කින් ගෙවීම සඳහා ඩොලර් මිලියන 300ක ඉන්ධන ලබාදීමට එම සමාගම කැමැත්ත පල කළ බවත් මන්ත්‍රීවරයා පෙන්වා දෙනවා.
කෙසේ නමුත් සාකච්ඡා අවසන් වී මාසයක් ගතවී ඇතත් එම ඉන්ධන ලබා ගැනීමට ඛනිජ තෙල් නීතිගත සංස්ථාව කටයුතු කර නොමැති බවත් සංස්ථාවේ ඉහළ නිලධාරීන් කිහිප දෙනෙක් මෙම ව්‍යාපෘතියෙන් කොමිස් නොලැබෙන හෙයින් එය වළක්වා ඇති බවත් මන්ත්‍රීවරයා පවසනවා.
