අග්‍රාමාත්‍ය මහින්ද රාජපක්ෂ මහතාට සිය ධූරයෙන් වහාම ඉල්ලා අස්වන ලෙසට බලකරමින් අරලියගහ මන්දිරිය ඉදිරිපිට මේ වන විට විරෝධතාවයක් ක්‍රියාත්මක වනවා.
එම ස්ථානය ‘මයිනාගෝගම ‘ ලෙස නම්කර විරෝධතාකරුවන් පිරිසක් අට්ටාලයක් අටවා දින දෙකක පටන් විරෝධතාවයේ නිරත වනවා.
කෙසේවෙතත් අදාළ විරෝධතාකරුවන්ගේ විරෝධතා වැකි නොඇසෙන පරිදි අද (27) උදෑසන පටන් අරලියගහ මන්දිරයේ පිරිත් විකාශය කිරීමට පටන්ගෙන තිබෙනවා.
ශබ්ද විකාශන යන්ත්‍ර යොදාගනිමින් ගාලු කොළඹ ප්‍රධාන මාර්ගයට පවා ඇසෙන පරිදි පිරිත් හඩ මේ වන විට රැව්පිළිරැව් දෙමින් පවතිනවා.
අග්‍රාමාත්‍ය මහින්ද රාජපක්ෂ මහතා ඊයේ තුන්වන වරටත් ප්‍රකාශ කළේ තමන් අගමැති ධූරයෙන් ඉවත් නොවන බවයි.
මේ වන විට 76 වන වියේ පසුවන අග්‍රාමාත්‍යවරයා මෙරට දෙවරක් ජනාධිපති ධූරයත්, තෙවරක් අග්‍රාමාත්‍ය ධූරයත් හොබවා තිබෙනවා.
කෙසේවෙතත් ඔහුගේ පාලන සමයේදී විශාල වශයෙන් වංචා දූෂණ සිදුවූ බවට ජනතාව චෝදනා එල්ල කරනවා.
2015 වසරේදී ජනාධිපති ධූරය අහිමිවූ පසුව වරෙක රැස්වීමක් අමතමින් මහින්ද රාජපක්ෂ මහතාද සදහන් කළේ තමන්ගේ පාලන කාලය තුළ වංචා දූෂණ සිදුවූ බවට තමන්ද පිළිගන්නා බවයි.
