කොළඹ විශ්ව විද්‍යාලයේ කුලපති, පූජ්‍ය මුරුත්තෙට්ටුවේ ආනන්ද හිමිගේ චරිතාපදානය සඳහා උත්සවයක් පැවැත්වීමට මුදල් යොදවන ලෙස ලැබුණු ආරාධනාවක් මත තමන්, එම ස්වාමීන් වහන්සේ සමග හිතවත්කමක් ඇති කර ගත් බව කොළඹ මහනගර සභාවේ නාගරික මන්ත්‍රී ප්‍රියංකා ජයසේකර ප්‍රකාශ කරනවා.
ඒ, මුරුත්තෙට්ටුවේ හිමිගේ v8 රථය සම්බන්ධයෙන් ඇයට එල්ලවන චෝදනා වලට පිළිතුරු ලබා දෙමින්.
එම හාදකම මත මුරුත්තෙට්ටුවේ ආනන්ද හිමියන් හා තමන් ව්‍යාපාරයක් ආරම්භ කළ බවත් එය පාඩු ලැබූ නිසා එම මුදල ගෙවීම සඳහා රථය විකුණා මුදල් ලබාගන්නා ලෙස කළ ප්‍රකාශ මත V8 රථය විකුණූ බවත් ඇය පවසනවා. 75 දෙනෙකුගේ රැකියාව අහිමි වීමේ අවදානමක් ඇති වූ බැවින් එම මුදල ලබා ගැනීමට සිදුවූ බවයි ඇය පවසන්නේ.
කෙසේ නමුත්, එම රථය මුරුත්තෙට්ටුවේ ආනන්ද හිමියන්ගේ නමට ලියාපදිංචි කර නොමැති බවත්, එසේ ලියාපදිංචි කර තිබේ නම් තමන්ට විකුණා ගැනීමට නොහැකි බවත් ඇය පවසනවා. තවද, වාහන අයිතිය මුරුත්තෙට්ටුවේ ආනන්ද හිමියන්ට ඇති බවට ඔප්පු කිරීමට හැකි නම් එය පෙන්වන ලෙසත් ඇය අභියෝග කරනවා.
ස්වාමීන් වහන්සේගේ විහාරස්ථානයේ සිය මියගිය අම්මා වෙනුවෙන් සිද්ධ හූනියම් දේවාලයක් ද ඉදි කර ඇති බැවින් තමන්ට අසාධාරණයක් කිරීම දෙවියන්ගෙන් දඬුවම් ලැබිය හැකි වරදක් බවයි ඇය පවසන්නේ.
මූල්‍ය චෝදනා ලැබ මේ වන විට රක්ෂිත බන්ධනාගාරගතව සිටින තිළිණි පියුමාලි නමැත්තිය වෙත තමන්ගේ ජීප් රථයක් ලබා දී ඇති බවට ජනතා විමුක්ති පෙරමුණේ වසන්ත සමරසිංහ නගන චෝදනාව අසත්‍ය බවත්, තමන් සිය ජීප් රථය ලබා දුන්නේ තිළිණි පියුමාලිට නොව කොළඹ මහ නගර සභාවේ නාගරික මන්ත්‍රීවරියක වන ප්‍රියංකා ජයසේකරට බවත් ඇය එම වාහනය විකුණා තමන්ට මුදල් ලබා නොදුන් බවත් පූජ්‍ය මුරුත්තෙට්ටුවේ ආනන්ද ස්වාමීන් වහන්සේ පසුගියදා පවසා සිටියා.
