කොළඹ නගරාධිපතිනි රෝසි සේනානායක මහත්මිය පුෂ්පිකා ද සිල්වා මහත්මියගෙන් රුපියල් මිලියන 500 ක වන්දියක් ඉල්ලා සිය නීතිඥයින් මාර්ගයෙන් ලිපියක් යොමුකර තිබෙනවා.
ආන්දෝලනාත්මක ලෙස 2021 විවාහක රූ රැජිණ ලෙස කිරුළු පලන් පුෂ්පිකා ද සිල්වා මහත්මිය චමුදිත සමරවික්‍රම මහතා සමග සම්මුඛ සාකච්ඡාවකට එක්වෙමින් චෝදනා කළේ හිටපු ලෝක විවාහක රූ රැජිණකද වන කොළඹ නගරාධිපතිනි රෝසි සේනානායක මහත්මිය තමන්ට ලෝක විවාහක රූජිණ කිරුළ අහිමි කිරීමට කටයුතු කළ බවයි.
පසුගියදා ඇමරිකාවේ ලාස්වේගාස්හීදී ලෝක විවාහක රූ රැජිණ තරඟාවලිය පැවති අතර එහිදී පුෂ්පිකාද සිල්වා අවසන් තරඟකාරියන් 6 දෙනා අතරට පැමිණියා.
පසුව චමුදිත සමරවික්‍රම සමඟ පැවති සම්මුඛ සාකච්ඡාවකදී පුෂ්පිකා ද සිල්වා මහත්මිය පවසා සිටියේ ඇතැම් විනිසුරුවරුන් තමන්ට පළමු ස්ථානය සදහා ඡන්දය ලබාදුන් බවයි.
නමුත් එම තරඟය නැරඹීමට ලාස් වේගාස් නුවරට පැමිණ සිටි රෝසි සේනානායක මහත්මිය එම තීරණය වෙනස් කිරීමට සංවිධායකයින්ට බලපෑම් කළ බවට තමන් සැක කරන බව ඇය සදහන් කළා.
එම චෝදනා ප්‍රතික්ෂේප කරන සේනානායක මහත්මිය සිය පෞද්ගලික තොරතුරු සමාජ මාධ්‍ය වෙත කාන්දු වීම සම්බන්ධයෙන් පරීක්ෂණයක් පවත්වන ලෙසද පොලිස්පතිවරයා වෙත ලිපියක් යොමුකරමින් ඉල්ලා සිටිනවා.
