නොරොච්චෝලේ LNG බලාගාරය ඇමරිකාවට දීමක් සිදු නොවී ඇති බවත් දී ඇත්තේ ඇමරිකානු සමාගමකට බවත් කර්මාන්ත අමාත්ය විමල් වීරවංශ මහතා පවසනවා.
පසුගිය සමයේදී දැඩි ඇමරිකානු විරෝධයක් දැක්වූ විමල් වීරවංශ අමාත්යවරයා නොරොච්චෝලේ LNG බලාගාරය ඇමරිකාවට ලබාදීම සම්බන්ධව දරන මතය පිළිබඳව පෙරේදා (16) දොඩම්ගස්ලන්ද, කහටගහ පතලේ නිරීක්ෂණ චාරිකාවකට පැමිණි අවස්ථාවේදී මාධ්යවේදීන් නැඟූ ප්රශ්නයකට පිළිතුරු ලබාදෙමින් ඔහු මේ බව පවසා සිටියා.
එහිදී වැඩිදුරටත් අදහස් දැක්වූ අමාත්යවරයා,
“ඇමරිකාවට දීමක් නෙවෙයි එතන තියෙන්නෙ ඇමරිකානු සමාගමකට දීමක්. ඇත්ත වශයෙන්ම වෙලා තියෙන්නෙ මුදල් අමාත්යාංශය සතුව තිබිච්ච කොටස් ප්රමාණය විතරයි එතෙන්දී දීලා තියෙන්නෙ. ඒ ඇරෙන්න විදුලිබල මණ්ඩලය සතු කොටස් හෝ අනෙකුත් කොටස් කිසිම ආකාරයකින් ඒ සමාගමට දීලා නෑ.
රට මුහුණ දීලා තිබෙන විදේශ විනිමය අර්බුදයත් එක්ක තමයි ඒ ඇතැම් පියවර ගැනීමට සිදුවී තිබෙන්නෙ. ඒක තමයි ඒ පියවර සාධාරණීකරණය කිරීම සඳහා ජනාධිපතිතුමන් විසින් කැබිනට් මණ්ඩලයට ඉදිරිපත් කරපු කාරණය වුණේ”