ජනාධිපති ගෝඨාභය රාජපක්ෂ මහතා විසින් අද (10) විවෘත කිරීමට යෙදුණු ‘ගෝඨාභය රාජපක්ෂ ක්‍රිකට් ක්‍රීඩාංගනයේ’ සමරු ඵලකයෙන් දෙමළ භාෂාව ඉවත්කර තිබීම පිළිබදව මේ වන විට විවිධ පාර්ශව විසින් විරෝධය එල්ලවනවා.
දෙමළ ප්‍රගතිශීලි සන්ධානයේ නායන මනෝ ගනේෂන් මහතා ට්විටර් පණිවුඩයක් නිකුත් කරමින් පෙන්වා දෙන්නෙ අදාළ ක්‍රියාව හරහා මෙරට භාෂා ප්‍රතිපත්තිය උල්ලංඝණය වී ඇති බවයි.
මනෝ ගනේෂන් මහතා පවසන්නෙ ක්‍රීඩංගනයක් හෝ ගබඩාවක් හෝ කුමක් වුවද එය ලංකාව තුළ විවෘත වන්නේ නම් පළමු පුරවැසියා වශයෙන් ජනාධිපතිවරයාට මෙරට භාෂා ප්‍රතිපත්තිය අනුගමනය කිරීමේ වගකීමක් ඇති බවයි.
මේ අතර ඉලංකෙයි තමිල් අරසු කච්චි පක්ෂයේ මඩකලපුව දිස්ත්‍රික් පාර්ලිමේන්තු මන්ත්‍රී ෂානක්කියන් රාජපුත්තිරන් රාසමාණික්කම් මහතාද ට්විටර් පණිවුඩයක් නිකුත් කරමින් අදාළ ක්‍රියාව හෙළා දැක තිබෙනවා.
ඔහු පවසන්නේ පසුගියදා චීන සමාගමක් විසින් ඔවුන්ගේ නාම පුවරුවකින් දෙමළ භාෂාව අත්හැර දැමූ විට තමන් කණස්සල්ලට පත්ව සිටි බවයි.
නමුත් මෙරට ජනාධිපතිවරයාම මෙලෙස කටයුතු කරන විට අනෙක් පාර්ශව වලින් භාෂා ප්‍රතිපත්තිය ආරක්ෂා වනු ඇතැයි බලාපොරොත්තු විය හැකිදැයි ඔහු ප්‍රශ්න කර සිටිනවා.
