වික්ටෝරියා ජලාශයේ දියේ ගිලීමෙන් මියගිය යුවළ බේරාගැනීමට උත්සාහ කළ පුද්ගලයෙකුද ඊයේ (15) පස්වරුවේ දියේ ගිලී මියගොස් ඇති බව පොලීසිය පවසනවා.
දිගන, කුඹුක්කඳුර ප්රදේශයෙන් වික්ටෝරියා ජලාශයේ දිය නෑමට ගිය අඹුසැමි යුවළක් ඊයේ පස්වරුවේ දියේ ගිලී තිබුණා
එහිදී ඔවුන් බේරාගැනීම සඳහා ඉදිරිපත් වූ 30 හැවිරිදි වියේ පසුවූ ප්රදේශවාසියෙකු මෙලෙස දියේ ගිලී මියගොස් ඇති බවයි වාර්තා වෙන්නේ.
දියේ ගිලී මියගිය අඹුසැමි යුවළ තිහාරිය ප්රදේශයේ පදිංචිකරුවන් වන අතර කාන්තාවගේ ගම් ප්රදේශයට ගිය අවස්ථාවේ මෙම අනතුරට මුහුණ දී තිබෙනවා.
මියගොස් ඇති සැමියාගේ වයස අවුරුදු 28ක් සහ බිරිඳගේ වයස අවුරුදු 22ක් බවද සඳහන්.
පළමුව කාන්තාව දියනෑම සඳහා ජලාශයට බැස ඇති අතර ඇය එක්වරම දියේ ගිලී තිබෙනවා.
අනතුරුව ඇය බේරාගැනීමට ඇගේ ස්වාමිපුරුෂයාත් සැණෙකින් ජලාශයට බැස ඇති අතර එහිදී ජල පහරට හසුව එම දෙදෙනාම අතුරුදන්ව තිබුණා.
එම අවස්ථාවේදී ඔවුන් බේරාගැනීමට ප්රදේශවාසියෙක් ද ජලයට බැස ඇති බව වාර්තා වෙනවා.
පළමුව බිරිඳගේ දේහය සොයාගෙන තිබුණු අතර පොලිසිය සහ ප්රදේශවාසීන් එක්ව සිදුකළ සෝදිසි මෙහෙයුමේදී සැමියා සහ ඔවුන් බේරාගැනීමට ගිය ප්රදේශවාසියාගේ සිරුරද සොයාගෙන තිබෙනවා.