තමා සිය අමාත්‍ය ධූරයේ කටයුතු වල නිරත වීමෙන් ඉවත් වන බවත් අමාත්‍ය මණ්ඩල රැස්වීම් වලට සහභාගී වීමෙන් වැළකෙන බවත් ජල සම්පාදන අමාත්‍යය වාසුදේව නානයක්කාර මහතා පවසනවා.
ඒ, උදය ගම්මන්පිළ සහ විමල් වීරවංශ යන මහත්වරුන්ව අමාත්‍යධූර වලින් නෙරපීමට විරෝධතාව පළ කරමින්.
කෙසේ නමුත් තමා ඉල්ලා අස් නොවන බවයි අද පෙරවරුවේ පැවති මාධ්‍ය හමුවක් අමතමින් ඔහු පවසා සිටියේ.
අවශ්‍ය නම් අමාත්‍ය වැටුපද ප්‍රතික්ෂේප කරන බවත් ඔහු පවසනවා.
මෙහිදී වැඩිදුරටත් අදහස් දැක්වූ අමාත්‍යවරයා,
“අවධානම පෙන්නන කොට ස්විච් එක නිව්වම හරියනව ද? මේ සම්බන්ධයෙන් ජනතාව පෙළගැස්වීමට අපිට වගකීමක් තියෙනවා. අපි විපක්ෂයට එකතු වෙන්නෙ නෑ. අපි අපේම ආවේණික වැඩපිළිවෙලක් වෙනුවෙන් ජනතා සහයෝගය එකතු කරනවා. උදය-විමල් විශාල ජනවරමක් ලැබූ අය. ඒ ගැණවත් තැකීමක් නෑ. ඔවුන්ට විරුද්ධව ගත් තීරණය ජනවරමට විරුද්ධව ගත් තීරණයක්.
රටේ පොදු ජනතාවගේ ජීවිත විශාල ගැටළුවක තියෙන්නේ. කෙටිකාලීනව ගැනීමට ඇති පියවර ගන්න ආණ්ඩුවට බලකරමින් ජන බලවේගයක් පෙළගස්සනවා. අපේ වැඩ පිළිවෙල දිහා නොබලා වෙන කාරණාවක් මුල්කරගෙන මේ තීරණ අරගෙන තියෙන්නේ. මේ සම්බන්ධයෙන් යුක්තිය ඉටු වෙන්න ඕනෙ. සජබෙට, ජවිපෙට යන්න බැරි නමුත් ආණ්ඩුවට ඡන්දය දුන්නු අයට හෙවණක් වෙන්නයි මේ එකමුතුව අපි ඇති කළේ”
