පකිස්තානයේ චීන සංවර්ධන ව්‍යාපෘතිවල සේවය කරන චීන ජාතිකයන් තමන්ගේ ආරක්ෂාව සළසා ගැනීමට සූදානම් වන බව වාර්තා වෙි.
ඒ අනුව ඔවුන් අවි ආයුද දැරීමටත්, අවි පුහුණුව ලබා ගැනීමටත් කටයුතු කරමින් සිටින බව විදෙස් මාධ්‍ය වාර්තාවල සදහන් වේ.
පකිස්තානයේ චීන ව්‍යාපෘතිවල චීන ජාතිකයන් දහස් ගණනක් සේවය කරන අතර ඔවුන්ට මෙන්ම එම ව්‍යාපෘතිවලටත් එරෙහිව බලුච් බෙදුම්වාදීන් සහ වෙනත් කණ්ඩායම්වලින් තර්ජන පවතී.
මේ හේතුවෙන් චීනය විසින් පකිස්තාන හමුදාවෙි තෝරාගත් බලඇණි වෙත විශේෂ ආධාර සහ උපකරණ ලබාදී අදාළ චීන ජාතිකයන්ගේ සහ ව්‍යාපෘතිවල ආරක්ෂාව තර කිරීමට පියවර ගෙන ඇත.
එසේ වුවද ප්‍රහාර සම්පූර්ණයෙන්ම මැඩපැවැත්වීමට නොහැකි වී ඇති අතර මීට දෙසතියකට පෙර කයිබර් පක්තුන්ක්වා ප්‍රාන්තයේ උතුරු කොයිෂ්තාන්හි ඩාසු වේලි ඉදිකිරීම් ව්‍යාපෘතියට සේවකයන් රැගෙන යමින් තිබූ බස්රථයකට එල්ල වූ ප්‍රහාරයකින් චීන ජාතිකයන් නව දෙනෙකු මිය ගියේය.
මෙම පසුබිම තුළ අදාළ චීන ජාතිකයන්ගේ ආරක්ෂාව සලසා ගැනීමට අදාළව ඔවුන් වෙත පුහුණුව සහ උපකරණ ලබාදීමේ විකල්ප වැඩපිළිවෙලක් වෙත යොමුවීමට තීරණය කර ඇතැයි වාර්තා වේ.
