බොරැල්ලේ පිහිටි අක්කර 40 කින් යුත් වැලිකඩ බන්ධනාගාර පරිශ්‍රය එම ස්ථානයෙන් ඉවත් කර එම ඉඩමෙහි හෝටල් ව්‍යාපෘතියක් ක්‍රියාත්මක කරන බව අග්‍රාමාත්‍ය මාධ්‍ය අංශය නිවේදනය කරනවා.
එම පරිශ්‍රයේ ඇති චැපල් වාට්ටුවත්, බන්ධනාගාර මූලස්ථාන ගොඩනැගිල්ලත් ඇති භූමිය මේ සදහා යොදාගන්නා අතර එම ක්‍රියාවලිය නාගරික සංවර්ධන අධිකාරිය දැනටමත් සැලසුම් කර අවසන් බවයි එම නිවේදනයේ දැක්වෙන්නේ.
ආයෝජකයින් කිහිප දෙනෙකු මේ වන විටත් එහි වෘපෘති සඳහා එකඟතාවය පළකර ඇති බව බන්ධනාගාර කළමණාකරණ හා සිරකරුවන් පුනරුත්ථාපන කටයුතු රාජ්‍ය අමාත්‍ය ලොහාන් රත්වත්තේ මහතා පවසනවා.
ඒ අනුව වැලිකඩ බන්ධනාගාර සංකීර්ණය හොරණ මිල්ලෑමේ අක්කර 200 ක භූමි භාගයක ප්‍රතිස්ථාපනය කෙරෙනු ඇති.
මෙම ව්‍යාපෘතියේ ප්‍රගතිය පිළිබදව සොයාබැලීමේ සාකච්ඡාවක් ඊයේ (06) දින Zoom යෙදුම හරහා අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් පැවැත්වුණා.
රුපියල් බිලියන 30 ක පිරිවැයකින් යුත් මෙම ව්‍යාපෘතිය 2024 වසරේදී අවසන් කිරීමට අපේක්ෂිත බව මෙම සාකච්ඡාවේදී නාගරික සංවර්ධන අධිකාරියේ හා බන්ධනාගාර දෙපාර්තමේන්තුවේ නිලධාරීන් අග්‍රාමත්‍යවරයාට දැනුම්දී තිබෙනවා.
ඒ අනුව වැලිකඩ බන්ධනාගාරයේ පවතින එල්ලුම්ගහද හොරණ මිල්ලෑවට රැගෙන යන බව බන්ධනාගාර කොමසාරිස් ජනරාල් තුෂාර උපුල්දෙණිය මහතා පවසනවා.
කෙසේ වෙතත් වැලිකඩ බන්ධනාගාරය මිල්ලෑවට රැගෙන යාමේදී කාන්තා රැදවියන් සමඟ සිටින දරුවන්ගේ සුබසාධනය වෙනුවෙන් කටයුතු කරන්නැයි අග්‍රාමත්‍යවරයා මෙහිදී නිලධාරීන්ට උපදෙස් ලබාදී තිබෙනවා.
