කෙරවලපිටිය යුගදනවි විදුලි බලාගාරයේ 40%ක කොටස් ඇමරිකානු සමාගමකට පවරාදීමේ ගිවිසුම සම්බන්ධයෙන් විමල් වීරවංශ, වාසුදේව නානයක්කාර වැනි පුද්ගලයින් දරන පුද්ගලික අදහස් අදාල නොවන බවත් එවැනි තීරණයක් ගැනීමේදී සලකා බලන්නේ එය රටට හිතකරද යන්න පමණක් බවත් ශ්‍රී ලංකා පොදුජන පෙරමුණේ මහලේකම් සාගර කාරියවසම් මහතා පවසනවා.
ඒ, ඊයේ (27) එම පක්ෂ මූලස්ථානයේ පැවති මාධ්‍ය හමුවක් අමතමින්.
එමෙන්ම, මුදල් අමාත්‍ය බැසිල් රාජපක්ෂ මහතා සමඟ පැවති විශේෂ සාකච්ඡාවකදී විමල් වීරවංශ, වාසුදේව නානායක්කාර යන අමාත්‍යවරුන්ට සහ හිටපු ජනාධිපති මෛත්‍රීපාල සිරිසේන මහතාට මේ සම්බන්ධයෙන් පැවති ප්‍රශ්නවලට තෘප්තිමත් පිළිතුරු සැපයූ බවත් ඒ කිසිවෙකු ඉන් අනතුරුව දිගින් දිගටම ප්‍රශ්න කිරීමක් සිදු නොකළ බවත් සාගර කාරියවසම් මහතා පෙන්වා දෙනවා.
එමෙන්ම ගිවිසුම සම්බන්ධයෙන් පක්ෂ නායක රැස්වීමක් කැඳවා අවශ්‍ය කරුණු පැහැදිලි කළ බැවින් ගිවිසුම සම්බන්ධයෙන් දැනුමක් නොමැති බවට කිසිඳු පක්ෂ නායකයෙකුට පැවසීමට නොහැකි බවත් ශ්‍රී ලංකා පොදුජන පෙරමුණේ මහලේකම්වරයා අවධාරණය කර සිටිනවා.
