එක්සත් ජාතික පක්ෂයේ නායක රනිල් වික්‍රමසිංහ මහතා එම පක්ෂයේ නායකත්වයට පත්වී වසර 27 ක් සපිරෙනවා.
1994 වසරේ නොවැම්බර් මස පක්ෂ නායකයා ලෙස තේරී පත් වූ රනිල් වික්‍රමසිංහ මහතා ඉන් අනතුරුව වර්තමානය තෙක් අඛණ්ඩව එම පක්ෂයේ නායකත්වය හොබවනවා.
පක්ෂ නායකත්වය සම්බන්ධයෙන් අවස්ථා රැසකදී අර්බුද රැසක් නිර්මාණය වූවද එම අර්බුද සියල්ල ජයගනිමින් ඔහු තවමත් පක්ෂයේ නායකත්වය රැකගෙන සිටිනවා.
පක්ෂ නායකත්වය තමන්ට නොලැබීම නිසාවෙන් හිටපු ජනාධිපති රණසිංහ ප්‍රේමදාස මහතාගේ පුත් සජිත් ප්‍රේමදාස මහතා පසුගිය මහමැතිවරණයට පෙර සමගි ජනබලවේගය නමින් වෙනත් පක්ෂයක් පිහිටුවාගෙන මැතිවරණයට මුහුණ දුන්නා.
පැවති මැතිවරණයෙන් රනිල් වික්‍රමසිංහ මහතාගේ නායකත්වයෙන් යුත් එක්සත් ජාතික පක්ෂයට කිසිදු මන්ත්‍රී ආසනයක් ජයග්‍රහණය කිරීමට අවස්ථාව නොලැබුණු අතර ජාතික ලැයිස්තුවෙන් පමණක් එක් මන්ත්‍රී ධූරයක් හිමිවුණා.
එම මන්ත්‍රී ධූරයටද යළිත් රනිල් වික්‍රමසිංහ මහතා පත්වී මෙවර පාර්ලිමේන්තුවට පැමිණියා.
රනිල් වික්‍රමසිංහ මහතා පක්ෂ නායකත්වයට පත්වන සමයේදී චන්ද්‍රිකා බණ්ඩාරනායක කුමාරතුංග මහත්මිය ශ්‍රී ලංකා නිදහස් පක්ෂයේ නායකත්වය දැරූ අතර ඉන් අනතුරුව මහින්ද රාජපක්ෂ, මෛත්‍රිපාල සිරිසේන යන අය එම පක්ෂයේ නායකත්වයට පත්වුණා.
