ජනාධිපතිවරයාගේ ප්රධානත්වයෙන් පැවති රාජ්ය කඨින උත්සවය පිළිබදව සමගි ජනබලවේගය පක්ෂයේ පාර්ලිමේන්තු මන්ත්රී හර්ෂණ රාජකරුණා මහතා ප්රශ්න කිරීමත් සමඟ අද (15) පාර්ලිමේන්තුවේ උණුසුම් තත්ත්වයක් හටගත්තා.
ඒ හෙට (16) දිනයේ පැවැත්වීමට නියමිත සමගි ජනබලවේගයේ විරෝධතා ව්යාපාරයකට එරෙහිව ආණ්ඩුව කොවිඩ් වසංගතය පිට දමා විවිධ ක්රියාමාර්ග ගනිමින් සිටියද රාජ්ය කඨින උත්සවය විශාල ජනතා සහභාගීත්වයකින් යුතුව පැවැත්වූයේ කෙසේදැයි ප්රශ්න කිරීමත් සමඟයි.
මීට පිළිතුරු දෙමින් රාජ්ය අමාත්ය දයාසිරි ජයසේකර මහතා පැවසුවේ අදාළ ආගමික උත්සවය තමන් සංවිධානය කළද ඊට කිසිසේත් ජනතාවට ආරාධනය නොකළ බවයි.
එම ස්ථානය පැමිණියේ ප්රදේශවාසීන් බවත් එහෙත් හෙට දිනයේ පැවැත්වෙන රැස්වීමට සමගි ජනබලවේගය පක්ෂය බස් රථ යොදාගනිමින් සෙනඟ රැස්කිරීම කොවිඩ් පැතිරීමට හේතුවක් බවත් රාජ්ය අමාත්යවරයා සදහන් කළා.
මේ අතර නැගී සිටි ආණ්ඩු පක්ෂයේ ප්රධාන සංවිධායක ජොන්ස්ටන් ප්රනාන්දු මහතා චෝදනා කළේ ගුරුවරුන්ද පාරට බස්සවා කොවිඩ් වසංගතය ව්යාප්ත කිරීමට කටයුතු කළේ විපක්ෂය බවයි.