ගල්පාත ප්‍රදේශයේදී බීමතින් අශෝභන ලෙස හැසිරුණු පානදුර ප්‍රාදේශීය සභාවේ ශ්‍රී ලංකා පොදුජන පෙරමුණේ මන්ත්‍රීවරයෙකු ප්‍රදේශවාසීන් විසින් අල්ලා විදුලි පහන් කණුවක ගැටගසා තිබෙනවා.
මෙම මන්ත්‍රීවරයා නොසන්සුන්කාරී ලෙස හැසිරී ප්‍රදේශවාසීන්ට හිරිහැර කිරීම නිසා කුපිත වූ පිරිසක් මන්ත්‍රීවරයාව විදුලි පහන් කණුවේ ගැට ගසා ඇති අතර පසුව ඔහුව කළුතර උතුර පොලිසියට භාරදීමට කටයුතු කළ බව ප්‍රදේශවාසීන් සදහන් කරනවා.
ශ්‍රී ලංකා පොදුජන පෙරමුණේ මෙම මන්ත්‍රීවරයා මිතුරන් පිරිසක් සමඟ ගල්පාත ප්‍රදේශයට පැමිණ මත්පැන් පානය කර තිබෙනවා.
පසුව ඔහු මිතුරන්ගෙන් වෙන්ව ගොස් ගල්පාන, නාහුරුපොළ ප්‍රදේශයේදී මෙලෙස අශෝභන ලෙස හැසිරී ඇති බවයි පොලීසිය සදහන් කරන්නේ.
ශ්‍රී ලංකා පොදුජන පෙරමුණේ මන්ත්‍රීවරයා නාගොඩ රෝහලේ වෛද්‍යවරයකු හමුවට ඉදිරිපත් කර ඇති අතර එහිදී සිදුකළ පරීක්ෂණවලදී ඔහු මත්පැන් පානය කර ඇති බව තහවුරු වී තිබෙනවා.
අදාළ මන්ත්‍රීවරයා අද කළුතර මහේස්ත්‍රාත් අධිකරණයට ඉදිරිපත් කරන බව පොලිසිය පවසනවා.
