මිල්කෝ ආයතනයේ නව සභාපතිවරයා ලෙස රේණුක පෙරේරා මහතාව පත්කර තිබෙනවා.
ඔහු ශ්‍රී ලංකා පොදුජන පෙරමුණේ පාලක ලේකම් ලෙසද කටයුතු කරයි.
එහි මෙතෙක් සභාපති ලෙස කටයුතු කළ ලසන්ත වික්‍රමසිංහ මහතාව එම ධුරයෙන් ඉවත් කර ඇති බවට ඊයේ (19) මාධ්‍ය රැසක් වාර්තා කර තිබූ නමුත් මාධ්‍ය හමුවක් කැඳවූ ලසන්ත වික්‍රමසිංහ මහතා සඳහන් කළේ, නව සභාපතිවරයෙකු පත්කර ඇතැයි තමන්ද දැනගත්තේ මාධ්‍ය හරහා බවයි.
රේණුක පෙරේරා මහතාව ලිට්රෝ සමාගමේ සභාපති ධූරයට පත් කිරීමට මුදල් අමාත්‍යවරයා මීට පෙර කටයුතු කළ නමුත් ජනාධිපතිවරයාගේ මැදිහත්වීමෙන් එම පත්වීම අවලංගු කරනු ලැබිණි.
මේ අතර, ලසන්ත වික්‍රමසිංහ මහතා මිල්කෝ සභාපති ධුරයෙන් ඉවත් නොකරන ලෙසට ඉල්ලමින් මිල්කෝ සමාජ ආරක්ෂක අරමුදලේ අධ්‍යක්ෂවරුන් පිරිසක් පශු සම්පත් රාජ්‍ය අමාත්‍යවරයා හමුවී දැනුවත් කර තිබෙනවා. දියර කිරි ලීටරයක මිල රුපියල් 5කින් ඉහළ දැමීමට සභාපතිවරයාට තීරණයක් ගත නොහැකි බවයි එහිදී රාජ්‍ය අමාත්‍යවරයා පවසා සිටියේ. එම මිල ඉහළ දැමීම සිදු කර ඇත්තේ ලසන්ත වික්‍රමසිංහ මහතා එහි සභාපති ධුරයෙන් ඉවත්කළ බවට වාර්තාවන පසුබිමක වීමත් විශේෂත්වයක්.
