ලිට්රෝ සමාගමේ නව සභාපති ලෙස ශ්‍රී ලංකා පොදුජන පෙරමුණේ පාලක ලේකම් රේණුක පෙරේරා මහතා පත්කර ඇති බව ආරංචි මාර්ග සඳහන් කරයි.
ලිට්රෝ සමාගමේ බහුතර කොටස් හිමි මුදල් අමාත්‍යංශය සහ ශ්‍රී ලංකා රක්ෂණ සංස්ථාව විසින් එම නිර්දේශය ලිට්රෝ අධ්‍යක්ෂ මණ්ඩලය වෙත යොමු කර ඇති බවයි පැවසෙන්නේ.
ආරංචි මාර්ග වැඩිදුරටත් සඳහන් කරන්නේ ලිට්රෝ ගෑස් සමාගමේ සභාපති තෙෂාර ජයසිංහ එම ධුරයෙන් ඉවත්කිරීමෙන් අනතුරුව මෙම නව පත්වීම සිදුකරනු ඇති බවයි.
එමෙන්ම, අද (13) දින පෙරවරුවේදී ජනාධිපති ගෝඨාභය රාජපක්ෂ මහතා කෙරවලපිටිය ලිට්රෝ ගෑස් පර්යන්තයේ හදිසි නිරීක්ෂණයකට එක්ව තිබෙනවා.
රේණුක පෙරේරා මහතා කලක් ජාතික නිවාස සංවර්ධන අධීකාරියේ සභාපති ධූරයේ කටයුතු කළ අතර ඔහු පසුගිය අප්‍රේල් මාසයේ එම තනතුරින් ඉල්ලා අස්වූයේ එම අධිකාරියේ රාජ්‍ය අමාත්‍යවරයා වන ඉන්දික අනුරුද්ධ මහතා විසින් දිගින් දිගටම සිදුකරන දූෂණ ක්‍රියා නිසාවෙන් බවට පසුව පවසා සිටියා.
ජාතික නිවාස සංවර්ධන අධිකාරියේ වත්මන් සභාපතිවරයා වන්නේ දුමින්ද සිල්වායි.
