ශ්‍රී ලංකා රූපවාහිනී රූපවාහිනි සංස්ථාවේ මාස 06ක කාලයකට අදාළ වැටුප් සහ අනෙකුත් අත්‍යවශ්‍ය වියදම් පියවා ගැනීම සඳහා රුපියල් කෝටි 24 ක මුදලක් ලබා දෙන්නැයි එහි පාලනාධිකාරිය මහා භාණ්ඩාගාරයෙන් ඉල්ලීමක් කර ඇති බව වාර්තාවනවා.
ඉකුත් පෙබරවාරි මස සිට ලබන ජූලි මාසය දක්වා කාලය තුළ සේවක වැටුප් හා අත්‍යවශ්‍ය පියවා ගැනීම සඳහා මෙම මුදල ඉල්ලා ඇති බවයි වාර්තාවන්නේ.
සංස්ථාවේ ආදායම පහත වැටීම හේතුවෙන් උපයන ආදායම සේවක වැටුප් ගෙවීම හා අත්‍යවශ වියදම් පියවාගැනීමට ප්‍රමාණවත් නොවන බව රූපවාහිනි පාලනාධිකාරිය මහා භාණ්ඩාගාරයට දැනුම් දී තිබෙනවා.
සංස්ථාවේ ආදායම් සහ වියදම් අතර පරතරය රුපියල් කෝටි හය හමාරක් පමණ වන අතර, ජාතික ලොතරැයි මණ්ඩලයෙන් මාසිකව හිමිවූ රුපියල් කෝටි තුනහමාරක පමණ ආදායම අහිමිවීම මීට බලපා ඇතැයි රූපවාහිනි සංස්ථාව පවසනවා.
රූපවාහිනී සංස්ථාවේ සේවක සංඛ්‍යාව 862 ක් පමණ වන අතර ඔවුන්ට වැටුප් ගෙවීමට පමණක් මාසිකව රුපියල් කෝටි නවයක පමණ මුදලක් වැයවන බවයි සංස්ථාව වැඩිදුරටත් පෙන්වා දෙන්නේ.
එවැනි තත්ත්වයක සේවකයින් හට ජනවාරි මාසයේ සිට රුපියල් 5000 ක අමතර දීමනාවක් ගෙවීම ඇරඹීම හේතුවෙන් මාසිකව තවත් ලක්ෂ 50ක අමතර වියදමක් කිරීමට සිදුව ඇති බවද රූපවාහිනි සංස්ථාව මහා භාණ්ඩාගාරයට දැනුම් දී තිබෙනවා.
