ණය ගෙවීමට නොහැකි නම් චීන ආයෝජනයෙන් කළ ශ්‍රී ලංකාවෙි සම්පත් සින්නක්කරව ලියා දෙන්නැයි චීනය පවසා තිබෙන බවට පළවන ප්‍රවෘත්ති සම්බන්ධයෙන් ආණ්ඩුවෙන් උත්තරයක් දිය යුතුව ඇතැයි විපක්ෂයේ ප්‍රධාන සංවිධායක ලක්ෂ්මන් කිරිඇල්ල පාර්ලිමේන්තුවේදී පවසා සිටියා.
ඒ, අතුරු අයවැය පිළිබඳ විවාදයට අද (01) දින එක්වෙමින්.
ඒ අනුව දකුණු අධිවේගී මාර්ගය ,මත්තල ගුවන් තොටුපොළ, කටුනායක අධිවෙිගී මාර්ගය,නෙළුම් කුළුණ,හම්බන්තොට වරාය ආදී ව්‍යාපෘති චීනයට දෙන්නට සිදුවෙනවා දැයි ලක්ෂ්මන් කිරිඇල්ල ප්‍රශ්න කර සිටිනවා.
කවුරු රට පාලනය කළත් ශ්‍රී ලංකාව යනු සියලුම දෙනාගේ රට බවයි එහිදී විපක්ෂයේ ප්‍රධාන සංවිධායකවරයා පවසා සිටියේ.
එමෙන්ම, රජයේ ආයතන ප්‍රතිව්‍යුහගත කරන බව පවසමින් සේවකයන් එළියට ඇද දමනවා නම් ඊට විරුද්ධ වන බවත් සේවක අයිතිවාසිකම් ආරක්ෂා කරගත යුතුව තිබෙන අතර ආයතන පනස් දෙකක් ප්‍රතිව්‍යුහගත කිරීමට හැකි දැයි ප්‍රශ්න කළ යුතුව ඇති බවත් ලක්ෂ්මන් කිරිඇල්ල පවසනවා.
අද රටේ ප්‍රධාන ප්‍රශ්නය ඩොලර් හිඟය වන නමුත් අය වැයේ රටට ඩොලර් ගෙනෙන එකම යෝජනාවක්වත් රජය සතු නැතැයි ලක්ෂ්මන් කිරිඇල්ල අවධාරණය කරනවා.
