ෆේස්බුක් අදහස් දැක්වීමක් හේතුවෙන් 2020 නොවැම්බර් මාසයේදී අපරාධ පරීක්ෂණ දෙපාර්තමේන්තුව විසින් අත්අඩංගුවට ගැනීමට එරෙහිව ජනතා අයිතීන් සුරැකීමේ පදනමේ මාධ්‍ය අධ්‍යක්ෂ චිරන්ත අමරසිංහ ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර තිබෙනවා.
පෙත්සම්කරු වෙනුවෙන් නීතීඥ ඩිලාන් නාලක හා නීතීඥ තිෂ්‍යා වේරගොඩ මහතා අදාල පෙත්සම ගොනුකර තිබෙනවා.
චිරන්ත අමරසිංහ මහතා පවසන්නේ කොවිඩ් වින්දිතයන් බලහත්කාරයෙන් ආදාහනය කිරීමට එරෙහිව සමාජ මාධ්‍යයන්හී තම මතය ප්‍රකාශ කිරීම හේතුවෙන් අපරාධ පරීක්ෂණ දෙපාර්තමේන්තුව තමන්ව අත්අඩංගුවට ගත් බවයි.
ඒ අනුව ජනාධිපතිවරයා ධූරයට පත්වී වසරක් පිරෙන දිනට පෙර තමා අත්අඩංගුවට ගත් බවත් අපරාධ පරීක්ෂණ දෙපාර්තමේන්තුව විසින් තම ජංගම දුරකථන රැගෙන ගොස් වසරක් පිරෙන බවත් අමරසිංහ මහතා සදහන් කරනවා.
“මාව අත්අඩංගුවට ගත්තේ ඇයිද, මා කළ වරද කුමක්ද කියාවත් එයාලා දැනගෙන හිටියෙ නැහැ. එයාලට ඕන වුණේ මාව අත්අඩංගුවට ගන්න විතරයි. හේතු වැදගත් වුණේ නැහැ. ෆේස්බුක් එකේ මම දාපු කමෙන්ට්වලට CID එකෙන් මට හිංසා කරන්න හදනවා “
