පසුගිය 06 වනදා කොළඹ අතිරේක මහේස්ත්‍රාත් අධිකරණය විසින් මුල් අයිතිකරු වෙත භාරදීමට නියෝග කළ සුජීවා නැමැති ඇතින්න හා එම ඇතින්න බිහිකළ මාස 04 ක් වයසැති අලි පැටවා කිසිදු පාර්ශවයක් ලෙස මුදාහැරීම වළක්වාලමින් අභියාචනාධිකරණය ඊයේ (22) වනජීවී දෙපාර්තමේන්තුවේ අධ්‍යක්ෂ්‍ය ජනරාල්වරයා වෙත නියෝගයක් නිකුත් කළා.
මහේස්ත්‍රාත් අධිකරණයේ නියෝගය අභියෝගයට ලක්කරමින් ස්වභාවික හා සංස්කෘතික අධ්‍යයන කේන්ද්‍රය සහ සතුන් උදෙසා යුක්තිය නැමැති සංවිධාන විසින් ගොනුකර තිබූ පෙත්සමක් සලකා බැලූ සෝභිත රාජකරුණා සහ ධම්මික ගනේපොළ යන විනිසුරු මඩුල්ල එම නියෝගය නිකුත් කරනු ලැබූවා.
තම අධිකරණයේ මෙම නියෝගය වහාම ජාතික සත්වෝද්‍යාන දෙපාර්තමේන්තුවේ අධ්‍යක්ෂ්‍ය ජනරාල්වරයා වෙත හා පින්නවල රිදීගම ඇත්අතුරු සෙවණේ පාලකවරයා වෙත යැවීමට පියවර ගන්නා ලෙසටද විනිසුරු මඩුල්ල අභියාකනාධිකරණයේ ලේඛකාධිකාරීවරයාටද නියෝග කළා.
එම පෙත්සම මෙන්ම කොළඹ අතිරේක මහේස්ත්‍රාත් අධිකරණය හා මාතලේ මහේස්ත්‍රාත් අධිකරණය විසිනු තවත් අලි ඇතුන් 14 දෙනකු මුදාහරිමින් නිකුත් කර තිබූ නියෝග අභියෝගයට ලක්කරමින් පරිසර යුක්ති කේන්ද්‍රය ඇතුළු සංවිධාන කිහිපයක් විසින් ගොනුකර තිබූ සෙසු පෙත්සම් සලකා බැලීම ලබන 29 වැනිදා යළි කැඳවීමට ද විනිසුරු මඬුල්ල නියෝග කරනු ලැබුවා.
නීතිඥ දිලුනි ද අල්විස්, නීතිඥ ලක්මිණි වරුෂවිතාන සහ නීතිඥ ශානක අමරසිංහ ඇතුළු නීතිඥ මණ්ඩලයක් සමඟ ජනාධිපති නීතිඥ සංජීව ජයවර්ධන මහතා පෙත්සම්කාර පාර්ශ්වය නියෝජනය කළ අතර සෙසු පෙත්සම්කරුවන් වෙනුවෙන් නීතිඥ නිල්පුල් වික්‍රමසිංහ මහත්මිය සමඟ ජ්‍යෙෂ්ඨ නීතිඥ රවින්‍ද්‍රනාත් දාබරේ මහතා පෙනී සිටියා.
මේ අතර ඊයේ (22) පාර්ලිමේන්තුවේදී සමගි ජනබලවේගය පක්ෂයේ පාර්ලිමේන්තු මන්ත්‍රී මයන්ත දිසානායක මහතා වනජීවී හා වන සංරක්ෂණ අමාත්‍ය සී.බී.රත්නායක මහතාගෙන් විමසා සිටියේ පසුගියදා මහේස්ත්‍රාත් අධිකරණ නියෝගයේ සඳහන්ව තිබූ N.G. රාජපක්ෂ මහතාට අයත් අලියෙක් හෝ අලි සම්බන්ධ බලපත්‍රයක් හෝ තිබේද යන්නයි.
ඊට පිළීතුරු දුන් වනජීවී හා වන සංරක්ෂණ අමාත්‍ය සී.බී.රත්නායක මහතා පැවසුවේ මේ වන තුරු ඒ පිළිබදව නොදන්නා බවයි.
