‘එක් රටක් – එක් නීතියක්’ සඳහාවූ ජනාධිපති කාර්ය සාධක බලකායක් පත්කර එහි සභාපතීත්වය බොදුබල සේනා සංවිධානයේ මහලේකම් පූජ්‍ය ගලගොඩඅත්තේ ඥාණසාර හිමියන් හට ලබාදීමට විරෝධය පා අධිකරණ අමාත්‍ය අලි සබ්රි මහතා ඉල්ලා අස්වීමට සූදානමින් පසුවනවා.
මේ වන විටත් ඔහු ඊට අදාළ අස්වීමේ ලිපිය ජනාධිපතිවරයා වෙත යොමුකර ඇති බවයි වාර්තා වන්නේ.
කෙසේ වෙතත් මේ වන විට විදෙස් ගතව සිටින ජනාධිපති ගෝඨාභය රාජපක්ෂ මහතා අලි සබ්රි මහතාට දැනුම්දී ඇත්තේ තමන් නැවතත් දිවයිනට පැමිණෙන තුරු හදිසි තීරණයක් නොගන්නා ලෙසයි.
කෙසේ වෙතත් අලි සබ්රි මහතා අමාත්‍ය ධූරයෙන් ඉවත්වුවද ශ්‍රී ලංකා පොදුජන පෙරමුණේ මන්ත්‍රී ධූරයෙන් ඉවත්වන්නේ දැයි මෙතෙක් කරුණු වාර්තා වන්නේ නැහැ.
මේ අතර එක රටක්, එක නීතියක්’ ජනාධිපති කාර්ය සාධක බලකායේ සාමාජිකයෙකු ලෙස නම්කර සිටින කොළඹ නාගරික මන්ත්‍රී කලීල් රහුමාන් මහතා සදහන් කර ඇත්තේ මෙම ජනාධිපති කාර්ය සාධක බලකායට තමන් පත්කර ඇති බව දැනගත්තේ ජනමාධ්‍යවලින් බවයි.
කලීල් රහුමාන් මහතා එක්සත් සාම සන්ධානය (UPA) යටතේ පසුගිය බස්නාහිර පළාත් මැතිවරණයට තරඟකොට කොළඹ නාගරික මන්ත්‍රීවරයෙකු ලෙස තේරී පත්ව තිබෙනවා.
එම පක්ෂයේ නායක බෂීර් සේගු දාවුද් මහතා පවසන්නේ එළැඹෙන සතියේ රැස්වී මෙම ගැටළුව පිළිබදව සාකච්ඡා කරන බවයි.
යම් හෙයකින් කලීල් රහුමාන් මහතා ඥානසාර හිමි යටතේ එම ජනාධිපති කාර්ය සාධක බලකායේ සාමාජිකත්වය ලබාගතහොත් ඔහුට එරෙහිව පක්ෂය විනය ක්‍රියාමාර්ග ගන්නා බවද බෂීර් මහතා සදහන් කරනවා.
නිවේදනයක් නිකුත් කරමින් සමස්ත ලංකා ජමියතුල් උලමා සංවිධානය පවසන්නේ ‘ආන්දෝලනාත්මක පුද්ගලයෙකුගේ’ නායකත්වය යටතේ ‘එක රටක්, එක නීතියක් සඳහා ජනාධිපති කාර්ය සාධක බලකාය’ පිහිටුවීමෙන් තමන් කම්පනයට සහ කලකිරීමට පත් වූ බවයි.
