ගුරු – විදුහල්වරුන් සිදුකළ වෘත්තීමය ක්‍රියාමර්ගයන් 2022 ජනවාරි 20 වනදා දක්වා තාවකාලිකව අත්හිටුවීමට එම වෘත්තීය සමිතීන් තීරණය කර තිබෙනවා.
අද (14) කොළඹදී පැවති ගුරු – විදුහල්පති වෘත්තීය සමිති සන්ධානයේ නියෝජිතයින්ගේ රැස්වීමකින් අනතුරුව මෙම තීරණයට එළඹුණු බවයි ලංකා ගුරු සංගමයේ ප්‍රධාන ලේකම් ජෝෂප් ස්ටාලින් මහතා පවසන්නේ.
එමෙන්ම, අධ්‍යාපනය සඳහා දළ දේශීය නිෂ්පාදිතයෙන් 6%ක් වෙන්කරවා ගැනීම, දෙමාපියන්ගෙන් මුදල් එකතු කිරීම නවතන ලෙස රජයට බලකිරීම ඇතුළු තවත් යෝජනා 10ක් ද අද දවසේ පැවති නියෝජිත රැස්වීමේදී සම්මත කරගත් බවත් ඒ මහතා පවසනවා.
“ගුරු-විදුහල්පති සන්ධානය අද දවසේ කොළඹදී රැස්වෙලා නියෝජිත හමුවක් විදියට අපි තීරණයක් ගත්තා අමාත්‍ය අනුකමිටු වාර්තාවට අනුව අපට වැටුප ලැබිය යුත්තේ 2022 ජනවාරි 20. අද සිට 2022 ජනවාරි 20 දක්වා අපි වෘත්තීය සමිති ක්‍රියාමාර්ග තාවකාලිකව අත්හිටෙව්වා. ඒ වගේම අපි බලාපොරොත්තු වෙනවා ආණ්ඩුව මේ සම්බන්ධයෙන් අවශ්‍ය කටයුතු කරලා මේ වැටුප අපට ලබාදෙන්න කටයුතු කරයි කියලා”
