කළුබෝවිල ශික්ෂණ රෝහලේ කොවිඩ් ආසාදිත වාට්ටුවේ තදබදය සම්බන්ධයෙන් පසුගියදා මාධ්ය කළ අනාවරණය පිළිබඳව සොයා බැලීම සඳහා ඖෂධ නිෂ්පාදනය, සැපයීම හා නියාමන රාජ්ය අමාත්ය මහාචාර්ය චන්න ජයසුමන මහතා එම රෝහලට පැමිණ තිබෙනවා.
එහිදී මාධ්ය වෙත අදහස් දක්වමින් රාජ්ය අමාත්යවරයා සඳහන් කළේ එය තාවකාලිකව ඇති වු තදබදයක් බවයි.
PCR හා රැපිඩ් ඇන්ටිජන් පරීක්ෂණ සිදුකර වාට්ටුවට යවන තුරු රෝගීන් වාට්ටුවෙන් පිටත සිටීමට සිදුවීම නිසා පසුගියදා එම තදබදය ඇතිබූ බවත් මේ වන විට කළුබෝවිල රෝහල තුළ කොවිඩ් රෝගීන්ට ප්රතිකාර කිරීම සඳහා අලුතින් වාට්ටු දෙකක් හදුන්වා දී ඇති බවත් රාජ්ය අමාත්යවරයා පවසනවා.
මේ හේතුවෙන් රෝහල තුළ කිසිදු තදබදයක් නොපවතින බවත් මේ වන විට මෘත ශරීර පවා එකතුවන තත්ත්වයක් මෙම රෝහල තුළ නොමැති බවත් ඔහු වැඩිදුරටත් සදහන් කළා.
කෙසේ වෙතත් රාජ්ය අමාත්යවරයා සදහන් කළේ කළුබෝවිල රෝහලේ ශීතාගාර 37 න් 20 ක පමණ මීට පෙර මියගිය එහෙත් හදුනා නොගත් පුද්ගලයින්ගේ මෘත දේහ තැන්පත් කර ඇති බවයි.
නීතිපති දෙපාර්තමේන්තුවේ උපදෙස් පරිදි එම මෘත දේහ මෙම සතිය තුළ ආදාහනය හෝ භූමදානය කිරිම සිදුකරන බවද චන්න ජයසුමන මහතා මෙහිදී සදහන් කළා.
එමෙන්ම සංචරණ සීමා නිදහස් කිරීමක් රට තුළ සිදුනොකළ බවත් ජනතාවගේ පහසුව වෙනුවෙන් ඇතැම් නීති හඳුන්වා දුන් බවත් පැවසු රාජ්ය අමාත්යවරයා, සියලුදෙනා සාමුහිකව රට තුළ පවතින තත්ත්වයට මුහුණදිය යුතු යැයි මාධ්ය ඉදිරියේ අදහස් දක්වමින් රාජ්ය අමාත්යවරයා පවසා සිටියා.