වත්මන් අර්බුදය ජනාධිපති ගෝඨාභය රාජපක්ෂ මහතාගේ වරදක් නොව පසුගිය ආණ්ඩු සියල්ලම සිදුකරන ලද ක්‍රියාකාරකම්වල ප්‍රතිපලයක් බව ජනප්‍රිය රංගන ශිල්පිනී අනූෂා දමයන්ති මෙනෙවිය පවසනවා.
ඇය පවසන්නේ පසුගිය ජනාධිපතිවරණ සමයේදී තමන් ජනාධිපතිවරයා වෙනුවෙන් පෙනී සිටි වීඩියෝ පටයක් මේ වන විට සමාජ මාධ්‍යවල සංසරණය වෙමින් තමන් හට දිගින් දිගටම පහරදීමක් සිදුකරන බවයි.
“මම මේ රජය වෙනුවෙන් වැඩ කළත් කිසිම තනතුරක් ලබාගත්තේ නැහැ. මට බැනලා සමාජ මාධ්‍යවල බොහෝ දෙනා විවිධ දේ කියා තිබෙනවා. මේ ටිකේ මගේ පරණ වීඩියෝ දාලා ඇට්ටි හැලෙන්න දෙනවා. මම විතරක් නෙවෙයි, අපි හැමෝම හිතුව දෙයක් නෙවෙයිනේ මේ වුණේ. මේක ජනාධිපතිතුමාගේම වරදක් නෙවෙයි. මේක එදා මෙදා ආණ්ඩුවල කරපු වරදවල් වල එකක් තමයි අපි අද මේ භුක්ති විදින්නේ කියලා මට නම් දැනෙන්නේ. මෙතුමා ඇත්තටම ගත්තේ මුකුත් නැති ආණ්ඩුවක්. බලමු ඉතිං මොකද වෙන්නේ කියලා.
ඇත්තටම මේ ප්‍රශ්නවලට උත්තර දෙන්න මම යන්නේ නැහැ. මොකද අපි දන්නෙත් නැහැ මොකද වෙන්නේ, මොකක්ද කරන්නේ කියලා. කලාකරුවෝ එකතුවෙලා මාධ්‍ය හමුවක් තියෙනවා කියලා ආරංචියක් යනවා. එතනදි කතාකරන්න තමයි හිතාගෙන ඉන්නේ. දැනට නිශ්ෂබ්දව ඉන්න තමයි අපිට වෙලා තියෙන්නේ.
එදා 69 ලක්ෂයක් මේ රජයට ඡන්දය දුන්නේ ලොකු විශ්වාසයක් මතයි. පිටරටවලින් පවා ඇවිත් ඡන්දය දුන්නා. ඒ ලොකු වෙනසක් කරන්න අවශ්‍ය වූ හින්දයි. ඒක මිනිස්සු විශ්වාස කළා. පස්සෙ කොරෝනා ප්‍රශ්න ආවා. පිටරටක යුද්ධය ආවා. උද්ඝෝෂණ විරෝධතා වැඩක් නැහැ. මේකට උත්තරය සොයාගන්නයි අවශ්‍ය. අද මුළු ලෝකයේම මේක වෙලා තියෙන්නේ. හැබැයි එළියට එන්නේ නැහැ.
