ශ්රී ලංකාවට ඉන්ධන මිලදී ගැනීම සඳහා ඉන්දියාව අතිරේක ඩොලර් මිලියන 500 ක මූල්ය ආධාරයක් ලබා දෙන බව විදේශ අමාත්ය මහාචාර්ය ජී.එල් පීරිස් මහතා ප්රකාශ කළ බව විදෙස් මාධ්ය වාර්තා කරනවා.
එමෙන්ම බංගලාදේශයට ගෙවිය යුතු ඩොලර් මිලියන 450 ක ගෙවීමක් කල් දැමීමටද බංගලාදේශය කැමැත්ත පළ කර ඇති බව අමාත්ය ජී.එල් පීරිස් මහතා රොයිටර්ස් පුවත් සේවය වෙත සදහන් කර තිබෙනවා.
“ජාත්යන්තර මුල්ය අරමුදලේ ආධාර අප වෙත පැමිණීමට මාස හයක් පමණ කාලයක් ගත විය හැකි අතර එය කොටස් වශයෙන් ලැබෙනු ඇතැයි”මහාචාර්ය ජී.එල් පීරිස් මහතා ප්රකාශ කළ බව රොයිටර්ස් පුවත් සේවය වාර්තා කරනවා.
එසේ ලැබීමට ගතවන කාලය තුළ ජනතාවට අත්යවශ්ය ද්රව්ය ලබා ගැනීම සඳහා ආධාර සොයා ගත යුතු බව අමාත්යවරයා වැඩිදුරටත් සඳහන් කරනවා.
මේ අතර ශ්රී ලංකාවට අත්යාවශ්ය ඖෂධ,සෞඛ්ය උපකරණ ,පෝෂ්යදායි සැපයුම් සහ අධ්යාපනය සම්බන්ධයෙන් හදිසි ආධාර සැපයිය හැකි බව ලෝක බැංකුව සදහන් කරනවා.
ශ්රී ලංකාවේ මුදල් ඇමති අලි සබ්රි සහ මහ බැංකුවේ අධිපති හා ආචාර්ය නන්දලාල් වීරසිංහ මහත්වරුන් හමුුවූ අවස්ථාවේ දී ලෝක බැංකුවේ දකුණු ආසියා උප සභාපති හාර්ට්විග් ශාෆර් මහතා මේ බව පවසා තිබෙනවා.
මෙම හමුවේ දී ශ්රී ලංකාව මුහුණ දී සිටින දරුණු ආර්ථික අර්බුදයෙන් ගොඩ එමින් දුප්පත් සහ අවදානමට ලක්විය හැකි ජනතාව ආරක්ෂා කළ යුතු ආකාරය සම්බන්ධයෙන් සාකච්ඡා කර ඇති බවයි වාර්තා වන්නේ.
ලෝක බැංකුව ශ්රී ලංකාව මුහුණ දී සිටින දරුණු ආර්ථික අර්බුදය හේතුවෙන් දුෂ්කරතාවලට මුහුණ පා සිටින දුප්පත් සහ අවධානමට ලක් වී සිටින පාර්ශ්ව වෙනුවෙන් හදිසි ආධාර සැපයීමට සූදානමින් සිටින බව ලෝක බැංකුවේ දකුණු ආසියා උප සභාපති හාර්ට්විග් ශාෆර් මහතා තම නිල ට්විටර් ගිණුමේ සටහනක් තබමින් සදහන් කර තිබෙනවා.