අපයෝජනයට ලක්වූ ළමයින්ගේ සාක්ෂි වීඩියෝ පටිගත කිරීම සඳහා පළාත් මට්ටමින් ඒකක 9 ක් පිහිටුවීමට අධ්‍යාපන අමාත්‍ය ජී.ඇල්. පීරිස් මහතා ඉදිරිපත් කළ යෝජනාවකට අමාත්‍ය මණ්ඩල අනුමැතිය හිමිව තිබෙනවා.
විවිධ අපචාර හා අපයෝජනයන්ට ලක්වූ ළමුන් විසින් එම සිද්ධියට අදාළව ලබාදෙන සාක්ෂි අධිකරණ ක්‍රියාවලියේදී ඉතා වැගත් වුවද එලෙස වින්දිතභාවයට පත්වූ ළමයෙකුට අධිකරණයේදී ප්‍රසිද්ධියේ සාක්ෂි ලබාදීමේදී විවිධ ගැටළුවලට මුහුණ පෑමට සිදුවන බව අමාත්‍යවරයා මෙහිදී පෙන්වා දී තිබෙනවා.
ඒ අනුව 1990 අංක 32 දරණ සාක්ෂි (විශේෂ විධිවිධාන) පනත මඟින් හදුන්වාදී ඇති සාක්ෂි වීඩියෝ පටිගත කිරීම් වශයෙන් ලබාගෙන ඉදිරිපත් කිරීම සඳහා වූ ප්‍රතිපාදනය මෙහිදී භාවිතා කිරිමට හැකියාව ඇති බව අදාළ යෝජනාවෙහි සදහන්.
දැනට මෙම ක්‍රමය ජාතික ළමා ආරක්ෂක අධිකාරිය මගින් 2001 වසරේ සිට වීඩියෝ සාක්ෂි පටිගත කිරීමේ ඒකකයක් පිහිටුවා කොළඹදී පමණක් සිදුකරමින් පවතිනවා.
එම පහසුකම පළාත් මට්ටමින්ද ඇති කිරීමට හැකිවන පරිදි දිවයිනේ පළාත් 9 ආවරණය වන පරිදි රෝහල් ආශ්‍රිතව වීඩියෝ සාක්ෂි පටිගත කිරීමේ ඒකක 9 ක් පිහිටුවීමට අමාත්‍ය ජී.එල්. පීරිස් මහතා යෝජනා කර තිබෙනවා.
