මුදල් හා ප්‍රාග්ධන වෙළෙඳපළ සඅමාත්‍ය අජිත් නිවාඩ් කබ්රාල් මහතා මේ සතිය තුළ ජනාධිපති ගෝඨාභය රාජපක්ෂ මහතාගේ ආරාධනයෙන් ‘මහ බැංකු අධිපති’ තනතුර භාර ගන්නා බවට පැවසූ බව ඩේලි මිරර් පුවත්පත වාර්තා කරනවා.
“මම ශ්‍රී ලංකා පොදුජන පෙරමුණේ ජාතික ලැයිස්තු මන්ත්‍රී ධුරයෙන් සහ රාජ්‍ය ඇමති තනතුරෙන් ඉවත් වී පක්ෂ නායක, අග්‍රාමාත්‍ය මහින්ද රාජපක්ෂ සහ ජනාධිපති ගෝඨාභය රාජපක්ෂ වෙත ඉල්ලා අස්වීමේ ලිපිය භාරදීමට බලාපොරොත්තු වෙනවා,” යැයි ඔහු එහිදී පවසා ඇත.
ආර්ථිකය ඉතා අර්බුදකාරී කාල පරිච්ඡේදයක් තුළ පවතින හෙයින් මහ බැංකු අධිපති ධූරය භාර ගන්නා ලෙස ජනාධිපති ගෝඨාභය රාජපක්ෂ මට ආරාධනා කළ නිසා මම එය පිළිගත්තා යැයි කබ්රාල් මහතා ඩේලි මිරර් වෙත පවසා ඇත.
සිය පාර්ලිමේන්තු මන්ත්‍රීධූරයෙන් සහ රාජ්‍ය අමාත්‍යධූරයෙන් ඉල්ලා අස්වීමට පෙර පාර්ලිමේන්තුවේදී සමුගැනීමේ දේශනයක් කරන බවත් ආර්ථික, මුදල්, විදේශීය ආයෝඡන, බැංකු හා ආනයන – අපනයන හා කාර්මික ගැටලු විසඳීම සඳහා පූර්ණ කැපවීමක් කිරීමට වැඩි කාලයක් හා අවස්ථාවක් මෙයින් ලැබෙන බවත් ඔහු පවසයි.
තමා ඉල්ලා අස්වීමෙන් පුරප්පාඩු වන ජාතික ලැයිස්තු තනතුර සඳහා සුදුස්සෙකු නම් කිරීමට ශ්‍රී ලංකා පොදුජන පෙරමුණ ඔහුට අවස්ථාව ලබා දුන් නමුත් ඔහු එය ප්රතික්ෂේප කළ බව කබ්රාල් මහතා පවසනවා. එමෙන්ම, වත්මන් මහ බැංකු අධිපති මහාචාර්ය ඩබ්ලිව්.ඩී. ලක්ෂ්මන් මහතා සිය ධුරයෙන් ඉවත් වීමෙන් පසුව ලෝක බැංකුවේ තනතුරක් ලබා ගනු ඇතැයි ද අපේක්ෂා කෙරෙනවා.
