කොවිඩ් පාලනය කිරීමට ඇති නීති රීතීන් කොවිඩ් පාලනයට නොව රජයට එරෙහි විරෝධතා මැඩලීමට යොදාගන්නේ නම් උද්ඝෝෂණ වෙනුවට වැඩවර්ජන වෙතට යොමු වීමට සිදුවනු ඇති බව සෞඛ්‍ය වෘත්තීයවේදීන්ගේ විද්වත් සංගමයේ සභාපති රවී කුමුදේශ් මහතා පවසනවා.
ඒ. ඊයේ (13) පැවැති මාධ්‍ය හමුවක් අමතමින්.
රාජ්‍ය සේවාවේ කාර්‍යක්ෂමතාවය වැඩිකිරීම පිළිබද අය වැය තුල ඇතැම් යෝජනා පරස්පර විරෝධී බවත් විශ්‍රාම යාමේ වයස අවුරුදු 65 දක්වා ඉහළ දැමීම මගින් සාමාන්‍ය පරිදි විශ්‍රාම යන අයට වසර දහයක විශ්‍රාම වැටුප අහිමි වන ලකුණු පහල වී ඇති බවත් ඔහු පෙන්වා දෙනවා.
මෙවර අය වැය මඟින් රාජ්‍ය සේවයේ වැටුප් විෂමතාවය, සෞඛ්‍ය වෘත්තීයවේදීන්ගේ විෂමතාවය පිළිබදව විසඳුම් සැපයීමට අපොහොසත්ව ඇති බවයි රවි කුමුදේශ් මහතා චෝදනා කර සිටින්නේ.
මේ අතර, නිරෝධායනය සහ රෝග වැළැක්වීමේ ආඥාපනතට සංශෝධන කිහිපයක් එකතුකරමින් සෞඛ්‍ය අමාත්‍ය කෙහෙළිය රඹුක්වැල්ල මහතා විසින් අතිවිශේෂ ගැසට් පත්‍රයක් නිකුත් කර තිබෙනවා. එම ගැසට් නිවේදනයට අනුව ඒකරාශීවීම්, එවැනි ක්‍රියාකාරකම් හෝ රැස්වීම් පැවැත්වීම සම්බන්ධයෙන් නිසි බලධාරීයාගෙන් අවසර ලබාගත යුතු අතර එසේ අවසර ලබානොගෙන එවැනි ක්‍රියාකාරකම්වල නිරතවිය නොහැකි බව සඳහන් වේ.
එම ගැසට් නිවේදනයට අනුව සමගි ජන බලවේගයට ලබන 16වැනිදා කොළඹ හයිට් පිටියේ රැස්වීමක් පැවැත්වීමට ලබා දී තිබූ අවසරය අත්හිටුවා තිබෙනවා.
කෙසේ නමුත්, සමගි ජන බලවේගය පවසන්නේ රජයේ ගැසට් නිවේදන නොසලකා “සාපය දැන් ඇති – අපි එනවා කොළඹට” යන මැයෙන් පැවැත්වෙන විරෝධතාවය පවත්වන බවයි.
